ধুবুৰী, ২১ এপ্ৰিল: তৃতীয় পৰ্যায়ৰ নিৰ্বাচনী প্ৰচাৰৰ অন্তিম দিনা নিৰ্বাচনী প্ৰচাৰ তুংগত তুলিছে অগপ-বিজেপি-বিপিএফ মিত্ৰ দলে ৷ আজি অন্তিম দিনা দুখনকৈ হেলিকপ্তাৰ লৈ ধুবুৰীৰ গৌৰীপুৰ সমষ্টিত নিৰ্বাচনী প্ৰচাৰ চলাই বিজেপি ৰাজ্যিক সভাপতি ৰঞ্জিত দাস, সংখ্যালঘু উন্নয়ন দপ্তৰৰ মন্ত্ৰী ৰঞ্জিত দত্ত, ৰাজ্য সভাৰ সাংসদ বিশ্বজিৎ দৈমাৰীকে ধৰি মিত্ৰ দলৰ কেইবাজনো নেতায়ে ৷
গৌৰীপুৰৰ মহামায়া খেলপথাৰত আয়োজিত এই নিৰ্বাচনী সভাত হেলিকপ্তাৰ লৈ উপস্থিত হয় সাংসদ বিশ্বজিত দৈমাৰী ৷ সভাত উপস্থিত হৈ আজমলৰ বাবেই অসম তথা ধুবুৰীয়ে কেন্দ্ৰীয় চৰকাৰৰ উন্নয়ন মূলক আঁচনিৰ পৰা বঞ্চিত হৈছে বুলি আজমলক তীব্ৰ ভাষাৰে সমালোচনা কৰে বিশ্বজিত দৈমাৰীয়ে ৷
খন্তেক পিছত বিজেপিৰ ৰাজ্যিক সভাপতি ৰঞ্জিত দাস আন এখন হেলিকপ্তাৰ লৈ উপস্থিত হয় নিৰ্বাচনী প্ৰচাৰ স্থলীত ৷ ৰঞ্জিত দাসে নিজৰ ভাষণত অসমৰ চৈধ্য খন আসনৰ ভিতৰত 13 খন আসনেই বিজেপি আৰু মিত্ৰদলে লাভ কৰিব বুলি প্ৰকাশ কৰে ৷
অৱশেষত নিৰ্বাচনী প্ৰচাৰ সভাত আকৌ এবাৰ মোডী চৰকাৰৰ গীতৰ তালে তালে বিজেপি আৰু মিত্ৰ দলৰ নেতা কৰ্মীয়ে নৃত্যত মতলীয়া হৈ পৰা পৰিলক্ষিত হয় ৷
