ধুবুৰী, 27 চেপ্তেম্বৰঃ দুৰ্গাপূজাৰ প্ৰাকক্ষণত ধুবুৰী আৰক্ষীৰ ড্ৰাগছ বিৰোধী অভিযান । অভিযানত দুজন ড্ৰাগছ সৰবৰাহকাৰী সহ জব্দ বৃহৎ পৰিমাণৰ নিচা জাতীয় সামগ্ৰী ।
ভাৰত বাংলা সীমান্তৰ ধুবুৰীত দীর্ঘ দিনে চলিছে ড্ৰাগছৰ ৰমৰমীয়া বেহা। পশ্চিম বংগৰ পৰা অসমলৈ প্ৰতিদিনে সৰবৰাহ হৈ আছে বিভিন্ন কোম্পানীৰ বৃহৎ পৰিমাণৰ ড্ৰাগছ জাতীয় সামগ্ৰী। তথ্য অনুসৰি, পশ্চিম বংগৰ পৰা ধুবুৰীলৈ নি ভাৰত বাংলা সীমান্তৰে বাংলাদেশলৈ ড্ৰাগছৰ চোৰাং চালান দি আহিছে একাংশ ব্যৱসায়ীয়ে । এক গোপন খবৰৰ ভিত্তিতে আৰক্ষীয়ে শুকুৰবাৰে পুনৰ অভিযান চলায় জব্দ কৰে নিচা জাতীয় সামগ্ৰীখিনি । অভিযানত ধুবুৰীৰ এঘাৰ নম্বৰ ৱাৰ্ডৰ নিৰ্মল বাঢ়ৈ আৰু নাৰায়ণ দাসৰ ঘৰৰ পৰা উদ্ধাৰ কৰে আঠ কাৰ্টন ড্ৰাগছ জাতীয় কফ চিৰাপ আৰু টেবলেট । মুঠ প্ৰায় ছয় শতাধিক বটল কফ চিৰাপ আছিল আঠটা কাৰ্টনত । ইপিনে এই ড্ৰাগছ সৰবৰাহ কৰাৰ অভিযোগত নিৰ্মল বাঢ়ৈ আৰু নাৰায়ণ দাসক ধুবুৰী আৰক্ষীয়ে আটক কৰি আৰম্ভ কৰিছে তদন্ত ।
উল্লেখযোগ্য যে, দূৰ্গা পূজাৰ প্ৰাকক্ষণত যাতে ড্ৰাগছ সেৱন কৰি কোনো লোকে অপ্ৰীতিকৰ পৰিস্থিতিৰ সৃষ্টি নকৰে তাৰ প্ৰতি চোকা দৃষ্টি ৰাখিছে ধুবুৰী আৰক্ষীয়ে । অৱশ্যে এই ক্ষেত্ৰত আৰক্ষীয়ে মুখ খোলা নাই সংবাদ মাধ্যমতৰ সন্মুখত ।
