ধুবুৰী, 22 ফেব্ৰুৱাৰী: বিগত কিছুদিন ধৰি ধুবুৰীত জিলা প্ৰশাসনে জিলাখনৰ বিভিন্ন অঞ্চলত কাঠফুলাৰ দৰে গঢ়ি উঠা অবৈধ ফাৰ্মাচী আৰু বিভিন্ন পৰীক্ষাগাৰৰ বিৰুদ্ধে অভিযান চলাই অহা দেখিবলৈ পোৱা গৈছে ৷ ইতিমধ্যে প্ৰশাসনে চলোৱা এই অভিযানত ধুবুৰী অসামৰিক চিকিৎসালয়ৰ সন্মুখত এটা পৰীক্ষাগাৰসহ তিনিখনকৈ ফাৰ্মাচী চীল কৰা হৈছে ৷
অবৈধ ফাৰ্মাচী আৰু পৰীক্ষাগাৰৰ বিৰুদ্ধে চলি থকা এই অভিযানৰ অংশ হিচাপে সোমবাৰে পুনৰ প্ৰশাসনিক বিষয়াৰ এটা দলে ধুবুৰী চহৰৰ দুৰ্গা দাস ৰোডত অৱস্থিত অমৰ ডাইগ'নষ্টিক চেন্টাৰত এক অভিযান চলায় ৷
ধুবুৰীৰ জিলা স্বাস্থ্য বিভাগৰ দায়িত্বত থকা ধুবুৰী জিলাৰ অতিৰিক্ত উপায়ুক্ত চৰফৰাজ হকৰ নেতৃত্বত প্ৰশাসনিক বিষয়াৰ দলটোৱে এই অভিযান চলায় ৷ অভিযানকাৰী দলটোৱে মৰ ডাইগ'নেষ্টিক চেণ্টাৰৰ কম্পিউটাৰৰ চিপিইউ আদি জব্দ কৰি লৈ যায় বুলি জানিব পৰা গৈছে ৷
জিলা প্ৰশাসনে এই সন্দৰ্ভত তদন্ত অব্যাহত ৰাখিছে যদিও তদন্তৰ খাতিৰতে বৰ্তমানেও এই সন্দৰ্ভত কোনো তথ্য প্ৰকাশ কৰা নাই ৷ উল্লেখ্য যে, দীৰ্ঘদিনৰ পৰা ধুবুৰীৰ একাংশ চেন্টাৰত ৰেডিঅ'লজিষ্ট আৰু পেথ'লজিষ্ট অবিহনে এক্সৰে আৰু ছন'গ্ৰাফী কৰি অহাৰ অভিযোগ উত্থাপিত হৈ আহিছে ৷
লগতে পঢ়ক: নগাঁৱত আৰক্ষীৰ জালত চোৰাং গৰু সৰবৰাহকাৰী
