ধুবুৰী, জুলাই 8 : ধুবুৰীৰ বীৰসিং পাৰঘাটত উত্তপ্ত পৰিস্থিতি । ধুবুৰী যোগময়া পাৰঘাটৰ পৰা বীৰসিং পাৰঘাটলৈ যোৱাৰ বাবদ নিৰ্ধাৰিত পাঁচ টকা ভাড়াৰ পৰিৱৰ্তে আঠ টকাকৈ সংগ্ৰহ কৰাৰ অভিযোগ একাংশ কংগ্ৰেছীৰ বিৰুদ্ধে ৷ উল্লেখ্য যে, ঘাটটো নিবিদা মৰ্মে লাভ কৰিছিল বীৰসিং পঞ্চায়তৰ প্ৰাক্তন সভাপতি চান্দ মিঞাৰ পুত্ৰ ৰহিম বাদশ্বাহে । ঘাটটো লীজত লোৱাৰ পাচতেই হঠাৎ ভাড়া পাঁচ টকাৰ পৰিৱৰ্তে আঠ টকালৈ বৃদ্ধি কৰে ৷ ফলত ৰাইজৰ মাজত তীব্ৰ প্ৰতিক্ৰিয়াৰ সৃষ্টি হয় । ৰাইজৰ অপত্তিৰ পিচতো গুৰুত্ব নিদিয়াত ৰাইজে বীৰসিং জৰুৱা খণ্ড উন্নয়ন বিষয়াক অৱগত কৰে সমগ্ৰ ঘটনা ৷ খণ্ড উন্নয়ন বিষয়াই পূৰ্বৰ দৰেই পাঁচ টকাকৈ ভাড়া সংগ্ৰহ কৰাৰ বাবে নিৰ্দেশ দিয়ে যদিও ৰহিমে এই নিৰ্দেশ আওকাণ কৰি নিজ ইচ্ছামতে সংগ্ৰহ কৰি আহিছে ভাড়া ৷
আনহাতে, ৰাইজে এই ঘটনাৰ প্ৰতিবাদ কৰাত ৰহিম বাদশ্বাহ আৰু একাংশ সমৰ্থকে ৰাইজক মাৰপিট কৰাৰ উপৰিও আক্ৰমণ কৰে বীৰসিং পঞ্চায়তৰ নিৰ্দলীয় সভাপতি আব্দুল লতিফক ৷ ইপিনে বিগত পঞ্চায়ত নিৰ্বাচন আৰু লোকসভা নিৰ্বাচনত পৰাজয় হোৱাৰ বাবেই নিৰ্বাচনী পটোক তুলিবলৈ নিৰ্দলীয় প্ৰাৰ্থী পঞ্চায়ত সভাপতিগৰাকীক আক্ৰমণ কৰা বুলি অভিযোগ কৰে পঞ্চায়ত সভাপতি গৰাকীয়ে ।
উল্লেখযোগ্য যে, ভুক্তভোগী ৰাইজ আৰু পঞ্চায়ত সভাপতিয়ে অভিযোগ কৰা মতে পঞ্চায়তৰ প্ৰাক্তন কংগ্ৰেছী সভাপতি চান্দ মিঞাকে ধৰি একাংশ কংগ্ৰেছীয়ে পঞ্চায়তত একছত্ৰী ৰাজত্ব চলাব বিচাৰিছে । চৰকাৰী আদেশ নমনা এইসকল উদণ্ড কংগ্ৰেছীৰ বিৰুদ্ধে প্ৰশাসনে কি ব্যৱস্থা গ্ৰহণ কৰে সেইয়াহে লক্ষণীয় হ'ব ৷
