ধুবুৰী, 28 জুলাইঃ বানৰ পাচতেই সক্ৰিয় চোৰাং গৰু ব্যৱসায়ী চক্ৰ । আৰক্ষীৰ অভিযানত জব্দ ডেৰ শতাধিক চোৰাং গৰু । আটক তিনিজন । বানপানীৰ মাজতো ধুবুৰীৰ ভাৰত বাংলা সীমান্তৰে গৰুৰ চোৰাং কাৰবাৰ অব্যাহত থকাৰ বিপৰীতে সম্প্ৰতি বান কমি অহাৰ পিছত অধিক সক্ৰিয় হৈ পৰিছে চোৰাং গৰু ব্যৱসায়ী চক্ৰ । দিনে নিশাই জাকে জাকে গৰু বাংলাদেশলৈ চোৰাংভাৱে চালান দিয়াৰ অভিযোগ উত্থাপন হৈছে চক্ৰটোৰ বিৰুদ্ধে ।
ধুবুৰী আৰক্ষীয়ে গোপন তথ্যৰ ভিত্তিত বিগত দুদিন ধাৰাবাহিকভাৱে অভিযান চলায় ধুবুৰী আৰক্ষীয়ে । বিগত 36 ঘন্টীয়া এক ধাৰাবাহিক অভিযান ধুবুৰী আৰক্ষীৰ । ধুবুৰী আৰক্ষীৰ দল এটাই গোলকগঞ্জ, ছাগলীয়া আৰু আগমণি আৰক্ষীৰ সহযোগত দিনে নিশাই অবিৰত অভিযানত জিলাখনৰ ভিন্ন প্ৰান্তৰ পৰা জব্দ কৰে মুঠ 156 টা চোৰাং গৰু । লগতে গৰু সৰবৰাহ কৰা এখন ট্ৰাক জব্দ কৰাৰ বিপৰীতে তিনিজন লোকক আটক কৰিছে আৰক্ষীয়ে । ধৃত মইনুল হক, আশ্ৰাফুল হক আৰু জাহিনুৰ ইছলামৰ পৰা গৰুৰ চোৰাং কাৰবাৰৰ অন্তৰালত থকা ছিণ্ডিকেটৰ অধিক তথ্য উদঘাটনৰ বাবে আৰক্ষীয়ে জেৰা অব্যাহত ৰাখিছে ।
লক্ষণীয় যে , আৰক্ষীয়ে এইদৰে অভিযান অব্যাহত ৰাখিলে বাংলাদেশলৈ গৰুৰ চোৰাং চালান একপ্ৰকাৰ বন্ধ হোৱাটো নিঃশ্চিত যদিও আৰক্ষীয়ে পৰৱৰ্তী সময়ত কেনে ভূমিকা গ্ৰহণ কৰে সেয়াহে লক্ষণীয় বিষয় ।
