ধুবুৰী, 12 অক্টোবৰ: ৰাজ্যত অব্যাহত আছে এটাৰ পিছত আনটো নাৰী নিৰ্যাতনৰ জঘন্য ঘটনা (Rape Case in Assam) ৷ এচাম লম্পটৰ বাবে যেন অসুৰক্ষিত হৈ পৰিছে ৰাজ্যৰ কিশোৰী, যুৱতী কিম্বা মহিলা । প্ৰত্যেক দিনাই বাতৰি কাকতৰ শিৰোনাম দখল কৰা নাৰী ধর্ষণ কিম্বা নাৰী নির্যাতনৰ বাতৰি প্ৰকাশ পাই আহিছে ৷ নাৰীৰ ওপৰত অত্যাচাৰ, নির্যাতন আদি প্ৰসংগক লৈ চৰকাৰ তথা বিভিন্ন বেচৰকাৰী সংস্থাসমূহে বিভিন্ন সজাগতামূলক কাৰ্যসূচীৰ জৰিয়তে জনসাধাৰণক সচেষ্ট কৰাৰ বাবে প্ৰচেষ্টা অব্যাহত ৰাখিছে ৷ কিন্তু ইয়াৰ পাছতো সুৰক্ষিত হ’ব পৰা নাই নাৰী ৷
শেহতীয়াকৈ ধুবুৰীৰ আগমণিত সংঘটিত হৈছে নাৰী নিৰ্যাতনৰ আন এক ঘটনা (Attempt to rape Case) ৷ এজন লম্পট চৰিত্ৰৰ লোকে এগৰাকী 15 বছৰীয়া নাবালিকাক ধৰ্ষণৰ অপচেষ্টা চলায় ৷ অভিযুক্ত লম্পটজনৰ নাম মিজাণুৰ ৰহমান ওৰফে বাচ্চা বাবু । এইজন ৪৫ বছৰীয়া লম্পটে বাৰে বাৰে লজ্জানত কৰি গৈছে আগমণি অঞ্চলৰ এখন ভিতৰুৱা গাঁৱৰ সভ্য সমাজক ।
ঘটনাৰ বিৱৰণী অনুসৰি, একে গাঁৱৰেই এগৰাকী নৱম শ্ৰেণীৰ ছাত্ৰীক বলপূৰ্বভাৱে ধৰ্ষণৰ অপচেষ্টা চলাই মিজাণুৰ ৰহমান ওৰফে বাচ্চা বাবুয়ে (Attempt to rape minor girl in Dhubri) । ঘটনাটো সংঘটিত হৈছিল যোৱা ৫ অক্টোবৰত । জানিব পৰা মতে নাবালিকাগৰাকীৰ পিতৃ দিৰ্ঘদিন ধৰি অসুস্থ হৈ আছিল ৷ সেয়ে পিতৃক এটুপি বিশুদ্ধ খোৱাপানী খোৱাবলৈ ঘৰৰ ওচৰতে থকা মিজাণুৰ ৰহমানৰ দমকলৰ পৰা পানী আনিবলৈ গৈছিল নাবালিকাগৰাকী । তেনে সময়তে ঘৰত কোনো নথকাৰ সুযোগ লৈ বলপূৰ্বকভাৱে নাবালিকাগৰাকীক নিৰ্যাতন চলায় লম্পট চৰিত্ৰৰ মিজাণুৰ ৰহমান ওৰফে বাচ্চা বাবুয়ে ।
কিন্তু নাবালিকাগৰাকীয়ে চিঞৰ-বাখৰ কৰি কোনোমতে নিজকে ৰক্ষা কৰিবলৈ সক্ষম হয় ৷ পিছত এইসকলো কথা নাবালিকাগৰাকীয়ে বিৱৰী কয় পৰিয়ালবৰ্গক । ইয়াৰ পাছতেই ঘটনা সন্দৰ্ভত পৰিয়ালবৰ্গই আগমণি আৰক্ষী থানাত দাখিল কৰে এজাহাৰ ।
কিন্তু তাৰ পিছৰ পৰাই নাবালিকাগৰাকীৰ জীৱনত আৰম্ভ হ’ল মাতব্বৰীৰাজ । স্থানীয় পঞ্চায়ত সভানেত্ৰীৰ স্বামী জলিলৰ নেতৃত্বত আৰম্ভ হয় দুই পক্ষৰ মীমাংসাৰ আলোচনা । কিন্তু আলোচনাত নহ’ল কোনো মীমাংসা । মাতব্বৰে লাহে লাহে ৰহস্যজনক ভূমিকা লৈ বাচ্চা বাবুৰ পক্ষ লোৱাৰ পিছত উপায়ন্তৰ হৈ ন্যায় বিচাৰি এতিয়া বিভিন্ন আৰক্ষী থানাৰ দুৱাৰে দুৱাৰে ঘূৰিছে নিৰ্যাতিতা নাবালিকা আৰু পৰিয়ালবৰ্গ ।
ইফালে স্থানীয় ৰাইজৰ অভিযোগ পূৰ্বেও এনে বহু লজ্জানত ঘটনা সংঘটিত কৰি আহিছে লম্পট চৰিত্ৰৰ মিজাণুৰ ৰহমানে ৷ কিন্তু একাংশ মাতব্বৰৰ ছত্ৰছায়াত থকাৰ বাবেই আইনী মেৰপেছত নপৰে বুলি অভিযোগ স্থানীয় ৰাইজৰ ৷
শেহতীয়াকৈ ধুবুৰী সদৰ আৰক্ষী থানাৰ মহিলাৰ বাবে থকা বিশেষ কোষত নিৰ্যাতিতাগৰাকীৰ সাক্ষ্য গ্ৰহণ কৰে আৰক্ষীয়ে । কিন্তু এইক্ষেত্ৰত স্থানীয় আগমণি আৰক্ষীয়ে ৰহস্যজনক ভূমিকা গ্ৰহণ কৰি থকাৰ অভিযোগ উত্থাপন কৰিছে স্থানীয় ৰাইজে । এতিয়া প্ৰশ্ন হয়, কেতিয়া আৰক্ষীৰ জালত পৰিব সভ্য সমাজক কুলসিত কৰা বিবাহিত লম্পট মিজাণুৰ ওৰফে বাচ্চা বাবু ? আৰক্ষীৰ তদন্তৰ আওতালৈ আহিবনে নাৰীৰ ওপৰত মাতব্বৰীৰাজ চলোৱা জলিল মাতব্বৰ ?
লগতে পঢ়ক: Gang Rape in Jharkhand: ঝাৰখণ্ডত নাবালিকাক দলবদ্ধ ধৰ্ষণৰ ঘটনা
