ধুবুৰী, 25 ছেপ্টেম্বৰঃ ধুবুৰীত উপস্থিত অসম বিধান সভাৰ বিধায়িনী দলৰ প্ৰতিনিধি ৷ গুৰুত্বপূৰ্ণ চাৰিটা বিভাগৰ কাম কাজৰ ক্ষেত্ৰ ভিত্তিক তদন্ত ৷ অসম বিধান সভাৰ আৱন্টন সমিতিৰ অধ্যক্ষ তথা বিধায়ক বৃন্দাবন গোস্বামীৰ নেতৃত্বত গৈছিল পাঁচ জনীয়া বিধায়িনী দলটো ৷ এই বিধায়িনী দলটোত আছিল ধিঙৰ বিধায়ক অমিনুল ইছলাম, কলাইগাঁওৰ বিধায়ক মহেশ্বৰ বড়ো, সৰুক্ষেত্ৰীৰ বিধায়ক জাকিৰ হুচেইন ছিকদাৰ আৰু ভৱানীপুৰৰ বিধায়ক আবুল কালাম আজাদৰ লগতে কেইবাজনো বিষয়া ৷ বিধায়িনী দলটোৱে জিলা খনৰ বিভিন্ন অঞ্চল পৰিদৰ্শন কৰি গড়কপ্তানী বিভাগ, সমাজকল্যাণ বিভাগ, কৃষি বিভাগ আৰু মীন বিভাগৰ উন্নয়নমূলক কাম কাজৰ বুজ লৈ ক্ষেত্ৰ ভিত্তিক তদন্ত কৰে । ইয়াৰ পাচতেই ধুবুৰী জিলা উপায়ুক্তৰ কাৰ্যালয়ত উক্ত বিভাগ কেইটাৰ সৈতে জড়িত থকা বিভাগীয় বিষয়া অভিযন্তা সকলক লৈ এখন গুৰুত্বপূৰ্ণ সভাত মিলিত হয় । এই সভাতে বিভিন্ন আঁচনিৰ ৰূপায়ণ আৰু অগ্ৰগতি সম্পৰ্কে মত বিনিময় কৰে বিধায়িনী দলটোৱে ৷
ইপিনে ক্ষেত্ৰ ভিত্তিক তদন্ত কৰাৰ পাচত সংবাদ মাধ্যমত মুখ খুলিব নোৱাৰে বুলি কৈ উল্লেখিত চাৰিটা বিভাগৰ কাম কাজত অসন্তুষ্টি প্ৰকাশ কৰে অধ্যক্ষ বৃন্দাবন গোস্বামীয়ে । উল্লেখযোগ্য যে, ক্ষেত্ৰ ভিত্তিক তদন্তৰ প্ৰতিবেদন অসম বিধান সভাৰ অধিৱেশনত দাখিল কৰা হ'ব বুলি জানিবলৈ দিয়ে বৃন্দাৱন গোস্বামীয়ে ৷
আনফালে নাগৰিকত্ব সংশোধনী বিধেয়ক সন্দৰ্ভতো প্ৰতিক্ৰিয়া প্ৰকাশ কৰি বিধায়ক খনৰ বিৰোধীতা কৰিছো বুলিও উল্লেখ কৰে অগপ নেতা গৰাকীয়ে ।
মন কৰিব লগীয়া যে , কেইদিনমান পূৰ্বে অগপৰ সাধাৰণ সম্পাদক ভূপেন ৰায়ে ধুবুৰীত উপস্থিত হৈ নাগৰিকত্ব সংশোধনী বিধেয়কক অগপ দলে আলোচনাৰ মাজেৰে সমৰ্থন কৰিব বুলি উল্লেখ কৰিছিল । তেনে পৰিস্থিতিত বৃন্দাবন গোস্বামীয়ে কেবক বিৰোধীতা কৰা বুলি মন্তব্য কৰাটোৱে অগপৰ নিজৰ মাজতে যে এই সন্দৰ্ভত অন্ত কন্দল আছে সেই কথা স্পষ্ট কৰি দিছে
