ধুবুৰী, 19 নৱেম্বৰ: সাংসদ বদৰুদ্দিন আজমলক কৃতজ্ঞতা ধুবুৰীবাসীৰ ৷ ব্ৰহ্মপুত্ৰৰ বুকুত এখন দলং নিৰ্মানৰ বাবে বহু দিনৰ পৰা দাবী উত্থাপন কৰি আহিছিল সমষ্টিটোৰ ৰাইজে ৷ ধুবুৰী সমষ্টিৰ দীৰ্ঘদিনীয়া যাতায়তৰ সমস্যাৰ বাবে এখন দলংৰ অতি প্ৰয়োজন আছিল ৷ সমষ্টিবাসীৰ সুবিধাৰ বাবে সংসদৰ মজিয়াত ব্ৰহ্মপুত্ৰৰ বুকুত ধুবুৰী ফুলবাৰীৰ দলং নিৰ্মাণৰ বাবে প্ৰবল দাবী উত্থাপন কৰি আহিছিল সাংসদ গৰাকীয়ে ৷
২০০৯ চনৰ পৰা সংসদৰ মজিয়াত দলংখন নিৰ্মাণৰ বাবে কেন্দ্ৰীয় চৰকাৰক দাবী উত্থাপন কৰি অহাৰ ফলতে কেন্দ্ৰীয় চৰকাৰে ব্ৰহ্মপুত্ৰৰ বুকুত এছিয়াৰ ভিতৰত সৰ্ববৃহৎ ধুবুৰী ফুলবাৰী দলং নিৰ্মাণৰ সিদ্ধান্ত গ্ৰহণ কৰিছে ৷ ইতিমধ্যে কেন্দ্ৰীয় চৰকাৰে ৩১ শ ৬৬ কোটি টকা আৱণ্টন দিছে বুলি সদৰী কৰে ধুবুৰী সমষ্টিৰ বিধায়ক নজৰুল হকে ৷
নিৰ্বাচনৰ পূৰ্বে দলংখনৰ আধাৰশিলা স্থাপন কৰি নির্মাণকাৰ্য আৰম্ভ কৰিবলৈ দাবী উত্থাপন কৰাৰ লগতে,কেন্দ্ৰীয় চৰকাৰে দলং খনৰ আধাৰশিলা স্থাপন কৰাৰ সময়ত সাংসদ বদৰুদ্দিন আজমলক নিমন্ত্ৰণ জনাবলৈ দাবী উত্থাপন কৰে বিধায়ক গৰাকীয়ে ।
বৃহস্পতিবাৰে ধুবুৰী জিলাবাসীৰ হৈ জিলা এ আই ইউ ডি এফে সাংসদ আজমলক কৃতজ্ঞতা জ্ঞাপন কৰিবলৈ ধুবুৰীৰ আদাবাৰী অঞ্চলত এক শোভাযাত্ৰা উলিয়ায় ৷ শোভাযাত্ৰাৰ অন্তত এখন কৃতজ্ঞতা সভা অনুষ্ঠিত কৰি সাংসদ বদৰুদ্দিন আজমল জিন্দাবাদ ধ্বনিৰে ধুবুৰীৰ বিস্তীৰ্ণ অঞ্চল মুখৰিত কৰি তোলে ৷
লগতে পঢ়ক: টাইমচ মিউজিকৰ বেনাৰত ৰাইজলৈ মুকলি নতুন এলবাম "নিৰিবিলি"
