ধুবুৰী, 21 আগষ্ট: এতিয়াও সম্পূৰ্ণৰূপে উন্মুক্ত ধুবুৰীৰ ভাৰত-বাংলা সীমান্তৰ বিশাল এলেকা । ধুবুৰীৰ ভাৰত-বাংলা সীমান্তত উপস্থিত হৈ স্তম্ভিত হ’ল সদৌ অসম ছাত্ৰ সন্থাৰ সঁজাতী দল । আছুৰ সাধাৰণ সম্পাদক শংকৰজ্যোতি বৰুৱা আৰু উপদেষ্টা প্ৰকাশ দাসৰ নেতৃত্বত এক বৃহৎ দল উপস্থিত হ’ল ধুবুৰীৰ ভাৰত-বাংলা সীমান্তৰ বিন্নাচৰা অঞ্চলত (AASU visits India Bangladesh border)।
বিন্নাচৰা অঞ্চলৰ গংগাধৰ নৈত অব্যাহত আছে ভয়ংকৰ গৰাখহনীয়া (Gangadhar River Erosion)। প্ৰতি বছৰে গৰাখহনীয়াত জাহ গৈছে সীমান্তৰ কাঁটা তাৰ আৰু পথ । ফলত দেশৰ প্ৰতি আহিছে চৰম ভাবুকি । উন্মুক্ত নদী সীমান্তৰে যিকোনো মুহূৰ্তত বাংলাদেশীয়ে প্ৰৱেশ কৰিব পাৰে অসম ভূমিত ।
অসম চুক্তি স্বাক্ষৰৰ ৩৭ টা বছৰ পাৰ হ’ল । অৰ্থাৎ প্ৰায় চাৰিটা দশক হ’বৰ হ’ল অসম চুক্তিৰ । কিন্তু অসম চুক্তি ৰূপায়ণত সম্পূৰ্ণৰূপে ব্যৰ্থ ৰাজ্য আৰু কেন্দ্ৰীয় চৰকাৰ । আজিও ছীল নহ’ল ধুবুৰীৰ সীমান্ত (Indio Bangladesh border in Dhubri)। আজিও সমাধান নহ’ল অবৈধ অনুপ্ৰৱেশ অথবা বিদেশীৰ সমস্যা । দেওবাৰে আছুৰ এটা সঁজাতী দল ধুবুৰীৰ সীমান্তৰ বিন্নাচৰা অঞ্চলত উপস্থিত হৈ তীব্ৰ ভাষাৰে সমালোচনা কৰিলে কেন্দ্ৰীয় আৰু ৰাজ্য চৰকাৰক ।
ইপিনে আছুৰ সঁজাতী দলটো বিন্নাচৰা সীমান্তৰ পৰা সীমান্ত পথেৰে গৈ উপস্থিত হয় কেডাৰ সীমান্তৰ ৫০ নং গেটত । কাঁইটীয়া তাঁৰৰ সিপাৰে থকা ভোগডাংগা আৰু ফাস্কাৰকুটি গাঁৱলৈ আছুৰ সঁজাতী দলটোৱে যোৱাৰ চেষ্টা কৰে যদিও বি এছ এফে অনুমতি প্ৰদান নকৰে ।
দেশ স্বাধীন হোৱাৰ ৭৫ টা বছৰেও একপ্ৰকাৰ পৰাধীন হৈ থকা গাঁও দুখনৰ ১৩০ টা পৰিয়ালৰ নিৰাপত্তা সুনিশ্চিত কৰাৰ লগতে তেওঁলোকক ভাৰতীয় হিচাবে মৰ্যাদা দিয়াৰ দাবী জনাইছে আছুৰ উপদেষ্টা প্ৰকাশ দাসে । ইয়াৰোপৰি সীমা নিৰ্ধাৰণৰ জ্বলন্ত সমস্যা সমাধান কৰাৰ ক্ষেত্ৰত চৰকাৰক গুৰুত্ব আৰোপ কৰিবলৈ দাবী জনায় ।
লগতে পঢ়ক: পৰীক্ষা নিৰীক্ষকৰ ভুলৰ বলি হ’ল নলবাৰীৰ ২১ গৰাকীকৈ পৰীক্ষাৰ্থী
