জোনাই, 14 নৱেম্বৰ : ৰাজ্য চৰকাৰৰ এটা বিয়াগোম চৰকাৰী বিভাগ ৷ বিয়াগোম বুলি কোৱাৰ প্ৰমাণ ৰাজ্যৰ কৃষক ৰাইজে প্ৰায়ভাগেই পাই আহিছে ৷ হয় আমি ক’ব বিচাৰিছো মন্ত্ৰী অতুল বৰা(Atul Bora)ৰ কৃষি বিভাগ(Agriculture Department)ৰ কথা ৷
জৰাজীৰ্ণ তথা গুদাম ঘৰত চলি আছে ৰাজ্যৰ অন্যতম গুৰুত্বপূৰ্ণ বিভাগটোৰ এটা শাখা ৷ জোনাই মহকুমা কৃষি বিভাগ(Sub-Divisional Agricuture Department Jonai)টোৰ অৱস্থা দেখিলে আপোনাৰো চকু কপালত উঠিব ৷ যেন শ্মশান যাত্ৰাহে চলিছে এই বিভাগটোত ৷
বানে গৰকা 80 শতাংশ কৃষিজীৱি লোকে বসবাস কৰা জোনাই মহকুমাত যি ধৰণে এটা পূৰ্ণাংগ কাৰ্যালয় থাকিব লাগিছিল, তাৰ সলনি এটি জৰাৰ্জীণ ঘৰত চলি আছে জোনাই মহকুমা কৃষি বিভাগটো ৷ এই জৰাৰ্জীণ ঘৰতে এটা ফালে কামত ব্যস্ত থাকে কৃষি বিভাগৰ কৰ্মচাৰী আৰু আনটো চুকত আছে চৰকাৰে আৱণ্টন দিয়া বস্তাই বস্তাই নানা কৃষিজাত সামগ্ৰী ৷
কৃষকৰ বাবে চৰকাৰে যোগান ধৰা নানা বীজ, ঔষধ, সাৰৰ লগতে নান সামগ্ৰীসমূহ থ’বলৈ কোনো গুদাম গৃহ নথকাত জোনাই মহকুমা কৃষি বিভাগে কাৰ্যালয়ৰ ভিতৰতে এনেদৰে জমা কৰি থ’বলগীয়া হৈছে সামগ্ৰীসমূহ ৷
আনহাতে, জোনাই মহকুমা কৃষি বিভাগৰ কাৰ্যালয়টো জহি-খহি যোৱাৰ বাবে বিগত কেইবা বছৰ ধৰি এটা কৃষি প্ৰশিক্ষণ কেন্দ্ৰকে কাৰ্যালয় হিচাপে ব্যৱহাৰ কৰি আহিছে বিভাগটোৱে ৷ কিন্তু আজিলৈকে দৃষ্টিগোচৰ হোৱা নাই কৃষি বিভাগ কিম্বা কৃষিমন্ত্ৰী অতুল বৰাৰ ৷
লগতে পঢ়ক : পাঁচ বছৰেও কাৰ্যক্ষম নহ'ল GMC ৰ জাৱৰৰ পৰা বিদ্যুৎ শক্তি উৎপাদন কৰা প্ৰকল্প
