ধেমাজি,15 মাৰ্চ: ৰাজ্যত এতিয়া ষ্টাৰ কেম্পেইনাৰৰ ভিৰ ৷ বিজেপি মিত্ৰজোঁটৰ প্ৰাৰ্থীৰ হকে ইজনৰ পিছত সিজনকৈ কেন্দ্ৰীয় মন্ত্ৰীয়ে চলাইছে প্ৰচাৰ অভিযান ৷ সোমবাৰে ১১২ নং ঢকুৱাখানা বিধানসভা সমষ্টিৰ প্ৰাৰ্থী তথা দুবাৰৰ বিধায়ক নৱ কুমাৰ দলেৰ হৈ ঢকুৱাখানা নিৰ্বাচনী ৰণডংকা বজালে বিজেপিৰ ৰাষ্ট্ৰীয় সভাপতি জে পি নাড্ডাই ৷ সোমবাৰে ঢকুৱাখানাৰ ৰাজহুৱা খেলপথাৰত নিৰ্বাচনী প্ৰচাৰ সভাত বিজেপিৰ ৰাষ্ট্ৰীয় সভাপতি জে পি নাড্ডাৰ লগতে উপস্থিত থাকে উপ সভাপতি বৈজয়ন্ত জয় পাণ্ডা, ৰাষ্ট্ৰীয় সাধাৰণ সম্পাদক দিলীপ শইকীয়া, স্থানীয় সাংসদ প্ৰদান বৰুৱা ৷
মিত্ৰজোঁটৰ প্ৰাৰ্থী নৱ কুমাৰ দলে ৰাজহুৱা খেলপথাৰত অনুষ্ঠিত এই নিৰ্বাচনী প্ৰচাৰ সভাত সমবেত কেইবা সহস্ৰাধিক বিজেপিৰ কৰ্মী-সমৰ্থকৰ উপস্থিতিত আদৰণি ভাষণ প্ৰদান কৰে ৷ ইয়াৰ পিছতে ৰাষ্ট্ৰীয় সভাপতি জে পি নাড্ডা উপস্থিত হোৱাৰ লগে লগে উষ্ম আদৰণি জনাই প্ৰাৰ্থী নৱ কুমাৰ দলেয়ে ৷
ৰাষ্ট্ৰীয় সভাপতি গৰাকীয়ে নিৰ্বাচনী ভাষণত প্ৰাৰ্থী নৱ দলেৰ বিগত সময়ছোৱাত সমষ্টিৰ উন্নয়নৰ বাবে যি পদক্ষেপ গ্ৰহণ কৰিলে তথা আগন্তুক দিনত ঢকুৱাখানাবাসীৰ আশা-প্ৰত্যাশা পূৰণৰ বাবে পুনৰবাৰ জয়ী কৰাই অসম বিধানসভালৈ পঠাবলৈ সমবেত ৰাইজক আহ্বান জনায় ৷ লগতে প্ৰাৰ্থীগৰাকী জয়ী হ’লে পুনৰবাৰ ঢকুৱাখনালৈ আহিব বুলি প্ৰতিশ্ৰুতি প্ৰদান কৰে ৷
ইপিনে সমষ্টিটোত জমি উঠিছে ৰাজনীতিৰ খেল ৷ ষ্টাৰ কেম্পেইনাৰৰ নিৰ্বাচনী ভাষণেৰে কিমান ক্ৰিয়া কৰিব ঢকুৱাখনাবাসীক, সেয়া ২৭ মাৰ্চত নিৰ্ধাৰণ হ’ব ৷ ঢকুৱাখানাবাসীয়ে ই ভি এমৰ জৰিয়তে নিৰ্ণয় কৰিব সমষ্টিত কোনে মাৰিব শেষ হাঁহি ৷
লগতে পঢ়ক: শোকাকুল পৰিৱেশত শেষকৃত্য সম্পন্ন নিতুল গগৈৰ
