জোনাই, 24 আগষ্ট : অসম- অৰুণাচল সীমান্তৱৰ্তী লিকাবালিত সংঘটিত হ'ল পুনৰ জঘন্য হত্যাকাণ্ড । এগৰাকী বিধৱা মহিলাক অস্ত্ৰৰে হানি-খুঁচি হত্যা কৰে দুই দুৰ্বৃত্তই । প্ৰাপ্ত তথ্য অনুসৰি, যোৱা ১৫ আগষ্টত লিকাবালিস্থিত এটি প্ৰাসাদসম অট্ৰালিকাত অকলশৰে থকা এগৰাকী ৭০ বছৰীয়া বৃদ্ধা মহিলাৰ ঘৰত চুৰিকাৰ্য সংঘটিত কৰি হত্যা কৰে বৃদ্ধা মহিলাগৰাকীক ৷ অভিযুক্ত দুই দুধৰ্ষ হত্যাকাৰীক্ৰমে অৰুণাচলৰ কেমবং আৰু অসমৰ চিলাপথাৰ আৰক্ষী থানাৰ অন্তৰ্গত মুক্তিয়াৰ নিৱাসী নীলকান্ত পাইত । প্ৰায় দুদিন পিছতে অৰুণাচল আৰক্ষীয়ে আপাৰ কলনিৰ পৰা মহিলাগৰাকীৰ মৃতদেহ উদ্ধাৰ কৰে ৷ তদন্তকাৰী বিষয়া লিকাবালিৰ অ’চি তুমকে আগুৰ নেতৃত্বত আৰক্ষীয়ে চলাই ২১ আগষ্টত গ্ৰেপ্তাৰ কৰিবলৈ সক্ষম হয় মূল অভিযুক্ত কেমবঙক আৰু ইয়াৰ স্বীকাৰোক্তিৰ ভিত্তিত কালি সহ অভিযুক্ত নীলকান্ত পাইতক আটক কৰে । এয়া ধৰ্ষণ কৰি হত্যাকাণ্ড সংঘটিত কৰা বুলি সন্দেহ প্ৰকাশ কৰিছে স্থানীয় লোকে ।
উল্লেখযোগ্য যে এই দুই অভিযুক্তৰ বিৰুদ্ধে লিকাবালি আৰক্ষী থানাত অন্তৰ্ভূক্ত হৈ আছে আন এটা গোচৰ। আৰক্ষীয়ে জনোৱা মতে, হত্যাকাণ্ড সংঘটিত কৰা কিছুদিন পূৰ্বে এই দুই অভিযুক্তই লিকাবালিস্থিত বালিকা উচ্চ মাধ্যমিক বিদ্যালয়ৰ ছাত্ৰী নিৱাসত ডকাইতি কাণ্ড সংঘটিত কৰিছিল ৷ লিকাবালি আৰক্ষীয়ে ঘটনাৰ সন্দৰ্ভত ভাৰতীয় দণ্ডবিধিৰ ৪৫৭ আৰু ৩৮০ ৰ অধীনত ২৪/২০১৯ ত গোচৰ পঞ্জীয়ন কৰি তদন্ত চলাই আছিল ।
