ধেমাজি, 15 এপ্ৰিলঃ কৰ’ণা আতংকৰ বাবে দেশজুৰি ঘোষণা কৰা লকত এইবেলি ম্লান পৰিল অসমীয়াৰ বাপতি সাহোন ৰঙালীৰ উছাহ ৷ একেদৰেই বিহুৰ এই বতৰত এলাগী হৈ পৰিল নাচনীৰ ঘিলা খোপাৰ সৌন্দৰ্য বহনকাৰী কপৌপাহি । ধেমাজিৰ এগৰাকী উদ্যমী কপৌফূলৰ খেতিয়ক টংকেশ্বৰ দলৈৰ বাৰীত জাতিষ্কাৰ হৈ পৰা নানাৰঙী কপৌফুল বিচাৰি এইবেলি তেখেতৰ ওচৰলৈ আহিব পৰা নাই কোনো নাচনী ৷ যাৰ ফলত এতিয়া গছতেই মৰহি যোৱাৰ উপক্ৰম হৈছে শ শ পাহ কপৌফুল ।
উল্লেখ্য যে,ধেমাজি নলনিপাম গাঁৱৰ উদ্যমী প্ৰকৃতিপ্ৰেমী লোকজনে দীৰ্ঘদিনধৰি কপৌ ফুল সংৰক্ষণ আৰু সংবৰ্দ্ধনৰ কামত নিজকে আত্মনিয়োগ কৰি আহিছে ৷ তেখেতে প্ৰায় ১৩০ বিধ বিভিন্ন প্ৰজাতিৰ কপৌফুল নিজৰ বাৰীত সংৰক্ষণ কৰিছে । বহাগৰ বতৰত নাচনীক ফুল বিক্ৰী কৰিয়ে কেইবাহাজাৰ টকা উপাৰ্জন কৰিবলৈ সক্ষম দলৈয়ে ৷
এইবেলি ফুলবোৰ ফুলিছে যদিও মন বিষাদেৰে ভৰাক্ৰান্ত হৈ পৰিছে । তৎসত্বেও প্ৰকৃতিৰ অপৰূপ সৌন্দৰ্য বৰ্ধন কৰাৰ বাবেই আত্মসন্তুষ্টি লভিছে কপৌফুলৰ খেতিয়কজনে ।
