ধেমাজি, 28 জুন : ধেমাজিৰ বন বিভাগ আৰু ভূমি সংৰক্ষণ বিভাগৰ ছত্ৰ-ছায়াত সোৱণশিৰিৰ বুকুত অবৈধভাৱে অসাধু চক্ৰই বনজ সম্পদ লুণ্ঠন কৰা কাৰ্যত জাঙুৰ খাই উঠিছে অসম জাতীয়তাবাদী যুৱ-ছাত্ৰৰ পৰিষদ । বৃহস্পতিবাৰে ধেমাজি প্ৰেছ ক্লাৱত যুৱ ছাত্ৰ পৰিষদৰ ধেমাজি জিলা সমিতিয়ে সংবাদমেল সম্বোধন কৰি সংশ্লিষ্ট বিভাগৰ ছত্ৰ-ছায়াত বন মাফিয়াসকলে সোৱণশিৰি বুকুত লুণ্ঠন অব্যাহত ৰাখি নদীখনৰ জীৱকূল আৰু সোৱণশিৰি দাতিকাষৰীয়া বণাঞ্চললৈ তীব্ৰ ভাবুকি কঢ়িয়াই অনা বুলি অভিযোগ উত্থাপন কৰে ৷ লগতে এই দুস্কাৰ্যৰ লগত জড়িত ক্ৰমে সুগ্ৰীৱ ভাৰতী, প্ৰদীপ দাস, ৰৌচন ক্ৰৌবা, মনোজ দিহিঙীয়া, ভুৰাম দত্ত, কনুজ চুতীয়া, তীথেশ্বৰ সোণোৱাল, জয়চৰণ বসুমতাৰী, জীতেন কলিতা, ভৱানন্দ দলে, সূৰ্য কোঁৱৰ, ধনীয়া মিলি, অদেশ তিৱাৰীকে ধৰি মুঠ 17 গৰাকীক বনদস্যু বুলি অভিহিত কৰি তেওঁলোকৰ বিৰুদ্ধে ধেমাজি সদৰ আৰক্ষী অধীক্ষকৰ ওচৰত গোচৰ ৰুজু কৰে ৷ লগতে এই 17 গৰাকীক অচিৰেই গ্ৰেপ্তাৰ কৰি শাস্তিৰ দাবী তোলে য়ুৱ ছাত্ৰ পৰিষদৰ ধেমাজি জিলা সমিতিয়ে ।
আনহাতে, অসাধু চক্ৰটোৱে প্ৰায় আঢ়ৈলাখ চিএম শিল-বালি সোৱণশিৰিৰ নদীৰ পাৰত অবৈধভাৱে ৰখাৰ উপৰিও বিভিন্ন স্থানত কৌশলেৰে ৰখাৰ অভিযোগ যুৱ ছাত্ৰৰ ৷ সংগঠনটোৱে অৱগত কৰা অনুসৰি, ভূমি সংৰক্ষণ বিভাগৰো বৃহৎ পৰিমাণৰ ভূমি বেদখল কৰি আহিছে । ইতিমধ্যে বন বিভাগৰ পৰা চল্লিশটা গোচৰ ৰুজু কৰিছে আৰু দহ জনৰ private Land Mining ৰ অনুজ্ঞাপত্ৰ বাতিল কৰিছে বন বিভাগে ।
ইপিনে সমগ্ৰ বিষয়টো অনুসন্ধানৰ বাবে ইতিমধ্যে চাৰিজনীয়া তদন্ত সমিতিক গঠনকলৈও আশ্বস্ত নহয় যুৱ ছাত্ৰ পৰিষদ । সেয়ে মুখ্যমন্ত্ৰীৰ অৰ্থনৈতিক অপৰাধ অনুসন্ধান শাখাৰ তদন্তৰ দাবী তুলিছে সংগঠনটোৱে ।
