ধেমাজি, 25 ডিচেম্বৰ: ব্ৰহ্মপুত্ৰৰ উত্তৰপৰীয়া ৰাইজৰ বাবে 25 ডিচেম্বৰৰ দিনটো অতিকৈ স্মৰণীয় দিন ৷ কিয়নো 2018 চনৰ 25 ডিচেম্বৰতে ভাৰতৰ প্ৰধানমন্ত্ৰী নৰেন্দ্ৰ মোদীয়ে দেশবাসীক সম্বোধন কৰি মুকলি কৰিছিল বহু প্ৰত্যাশিত ব্ৰহ্মপুত্ৰৰ ওপৰৰ বগীবিল দলং ৷ ব্ৰহ্মপুত্ৰৰ উত্তৰ পাৰ আৰু দক্ষিণ পাৰৰ সৈতে যোগাযোগৰ ক্ষেত্ৰত নতুন দিগন্তৰ সূচনা কৰিছিল এই দিনটোতে ৷
কেইবা দশক ধৰি ব্ৰহ্মপুত্ৰৰ কাৰং ঘাট আৰু বগীবিল ঘাটৰ সৈতে বিপদসংকুল ফেৰী সেৱা ব্যৱস্থাৰ অৱসান ঘটাই ২০১৮ চনৰ ২৫ ডিচেম্বৰত মুকলি কৰা হৈছিল বহু প্ৰত্যাশিত দলঙখন ৷ যাৰ বাবে উত্তৰ আৰু দক্ষিণ পাৰৰ মাজত যাতায়ত, স্বাস্থ্য, সাংস্কৃতিক, ব্যৱসায় আৰু শিক্ষাৰ ক্ষেত্ৰত অভূতপূৰ্ব পৰিৱৰ্তন হ'ল ৷ বিশেষকৈ বগীবিল সেঁতু মুকলি হোৱাৰ পাচতে উত্তৰ পাৰৰ ধেমাজি, ঢকুৱাখনা, লখিমপুৰ আৰু অৰুণাচল প্ৰদেশৰ বহু লোক উপকৃত হৈছে ৷
উল্লেখ্য যে, বগীবিল দলং মুকলি কৰাৰ পহিলা বৰ্ষটোত বিভিন্ন দল সংগঠনে স্বচ্ছতাৰ দিশটোৰ ওপৰত চকু দিছিল যদিও বৰ্তমান একাংশ অসচেতন ব্যক্তিৰ বাবে আকৌ লেতেৰা হৈ পৰিছে হেপাঁহৰ দলঙখন ৷ দলঙৰ চুকে কোণে পৰি ৰৈছে পলিথিন, পানী বটলৰ দৰে আৱৰ্জনাবোৰ, যিয়ে ম্লান কৰিছে দলং খনৰ সৌন্দৰ্য ৷
লক্ষনীয়ভাৱে বহু দেশী-বিদেশী পৰ্যটকেও এই দলঙেৰে পাৰ হৈ ক্ষন্তেক জিৰণি লৈ সৌন্দৰ্য উপভোগ কৰি কেমেৰাত বন্দী কৰে ব্ৰহ্মপুত্ৰৰ দৃশ্য ৷ এই ঐতিহাসিক বগীবিল দলংখনৰ সৌন্দৰ্য আৰু স্বচ্ছতাৰ দিশটোৰ প্ৰতি সকলোকে গুৰুত্ব সহকাৰে ল'বলৈ আহ্বান জনালে ধেমাজিৰ সচেতন নাগৰিক সকলে ৷
লগতে পঢ়ক: বগীবিলত মুখ্যমন্ত্ৰীয়ে উদ্বোধন কৰিলে অত্যাধুনিক জাহাজ ব্ৰহ্মপুত্ৰৰ মুকুতা
