ধেমাজি ,12 মে' : উন্নয়ন আৰু পৰিৱৰ্তনৰ ধাক-ঢোল বজায় ফুৰা চৰকাৰৰ কেবাখনো অভিলাষী আঁচনিয়ে আজিকোপতি ঢুকি পোৱা নাই ৰাজ্যৰ কেবাটাও অঞ্চল । বিশেষকৈ ৰজাঘৰীয়াৰ পৰা অৱহেলিত হৈ আহিছে ধেমাজিৰ বিধানসভা সমষ্টি অন্তৰ্গত বৰদলনি উন্নয়ন খণ্ডৰ অধীনৰ খনাকৃষ্ণপুৰবাসী।
বছৰ বছৰ ধৰি খনাকৃষ্ণপুৰবাসীয়ে এখন জৰাজীৰ্ণ বাঁহৰ দলঙেৰে যাতায়ত কৰি আহিছে । বৰদলনি, ভোমা , গোথালি গোগামুখৰ সৈতে সংযোগী এই অঞ্চলটোৰ পথছোৱা আজিলৈ পকীকৰণ নকৰাৰ অভিযোগ উত্থাপন কৰিছে ৰাইজে । আনহাতে, আগন্তুক বাৰিষাক লৈ শংকিত হৈ পৰিছে ধেমাজি সদৰৰ পৰা মাত্ৰ ২০ কি:মি:নিলগৰ খনাকৃষ্ণপুৰবাসী । কাৰণ বাৰিষা বহি জগতৰ পৰা সম্পূৰ্ণ বিচ্ছিন্ন হৈ পৰে অঞ্চলবাসী ।
তৎসত্বেও এই পৰ্যন্ত যাতায়তৰ পথছোৱা মেৰামতি কৰি দিবলৈ আগবাঢ়ি অহা নাই কোনো জনপ্ৰতিনিধি ৷ স্থানীয় ৰাইজৰ অভিযোগ অনুসৰি, নিৰ্বাচনৰ আগত ভোট বিচাৰি আহি প্ৰতিশ্ৰুতি দি যোৱা বিধায়ক ৰণোজ পেগুৱে পাহৰিলে ৰাইজৰ দুৰৱস্থাৰ কথা ।
লগতে পঢ়ক : মুম্বাইৰ পৰা আহি জন্মভূমিত উপস্থিত জুবিন গাৰ্গ
