জোনাই , 15 ছেপ্টেম্বৰঃ জোনাই মহকুমাস্থিত মুৰ্কংচেলেক মহাবিদ্যালয়ত দিনজোৰা বৰ্ণাঢ্য কাৰ্যসূচীৰে 27 সংখ্যক ৰাষ্ট্ৰীয় শিশু বিজ্ঞান সমাৰোহ অনুষ্ঠিত কৰা হয়৷ ধেমাজি জিলাৰ ৰাষ্ট্ৰীয় শিশু বিজ্ঞান সমিতিৰ উদ্যোগত এই ৰাষ্ট্ৰীয় শিশু বিজ্ঞান সমাৰোহ খন অনুষ্ঠিত কৰা হয়৷
উল্লেখ্য যে এইবাৰৰ প্ৰকল্পৰ মূল বিষয় আছিল 'এখন পৰিচ্ছন্ন, সেউজ আৰু সুস্থ দেশৰ বাবে বিজ্ঞান, প্ৰযুক্তি আৰু উদ্ভাৱন'। সমাৰোহত জোনাই , চিলাপথাৰ, ধেমাজি, গোগামুখ আৰু মাছখোৱা আদি বিভিন্ন ঠাইৰ পৰা 111 টা প্ৰকল্প উপস্থাপন কৰাৰ লগতে দুকুৰি বিজ্ঞান আৰ্হি প্ৰদৰ্শন কৰা হয়|এই 111 টা প্ৰকল্পৰ মাজৰ পৰা 11 টা প্ৰকল্প ৰাজ্যিক পৰ্যায়ৰ সমাৰোহত অংশগ্ৰহণ কৰিবলৈ নিৰ্বাচিত কৰা হৈছে| আনহাতে আগন্তক 28 সংখ্যক ৰাষ্ট্ৰীয় শিশু বিজ্ঞান সমাৰোহখনি জিলা খনৰ চিচি চাৰিআলিৰ উচ্চ মাধ্যমিক বিদ্যালয়ত অনুষ্ঠিত কৰাৰ সিদ্ধান্ত গ্ৰহণ কৰা হয়|
