মঙলদৈ, ১৩ মে': কৰ'ণা আতংকৰ মাজতেই মঙলদৈ শক্তি বিভাগে আতংকিত কৰিছে একাংশ গ্ৰাহকক । আজৱ কাণ্ড সংঘটিত হৈছে বিভাগটোত । মঙলদৈ চহৰৰ ৮নং ৱাৰ্ডৰ জ্ঞান গুৰুকুল জাতীয় বিদ্যালয়ৰ এমাহৰ বিদ্যুতৰ বিল আহিল ৭৭ লাখ ৭০ হাজাৰ ৪৯৬ টকা । লকডাউন চলি থকাৰ বাবে বন্ধ হৈ আছে বিদ্যালয়খন ।
কিন্তু লক ডাউনৰ মাজতে বিদ্যালয় পৰিচালনা সমিতিৰ সভাপতিৰ ম'বাইলত অহা এটি মেছেজ দেখি চকু কপালত উঠিল সভাপতি গৰাকীৰ । প্ৰতিমাহে তিনিশৰ পৰা চাৰিশ টকা বিল পৰিশোধ কৰি অহা বিদ্যালয়খন লক্ ডাউনৰ বাবে প্ৰায় দুমাহ বন্ধ থকা অৱস্থাত বৃহৎ পৰিমাণৰ বিল আহিল । বিদ্যালয়খনৰ সভাপতি কুশল ডেকাই উল্লেখ কৰে যে, এনে আজৱ কাৰ্য পূৰ্বেও সংঘটিত হৈছে মঙলদৈ শক্তি বিভাগত । কাৰিকৰী দিশত অত্যাধুনিক হ'ল যদিও সলনি নহ'ল বিভাগটোৰ খেলিমেলি ।
ইয়াৰ পূৰ্বেও এখন ডেৰ লাখ টকাৰ বিল শুধৰণি কৰিবলৈ মঙলদৈ শক্তি বিভাগৰ কাৰ্যালয়লৈ চাৰি মাহ তাতবাতি কাৰিব লগা হৈছিল বুলি জানিবলৈ দিয়ে সভাপতি গৰাকীয়ে ।
