ছিপাঝাৰ, 31 অক্টোবৰঃ ধোৱাচাঙত পৰিণত হৈছে শিশু শিক্ষা অধিকাৰ 2009 ৷ চৰকাৰ তথা শিক্ষা বিভাগৰ হঠকাৰী সিদ্ধান্তই বিপাঙত পেলাইছে বহু শিক্ষাৰ্থীৰ লগতে অভিভাৱকক ৷ বহু শিক্ষাৰ্থীৰ জীৱনলৈ নামি আহিছে অমানিশা ৷
উল্লেখ্য যে,চৰকাৰে সিদ্ধান্ত লৈছে দৰং জিলাৰ ২৫ খন চৰকাৰী বিদ্যালয় বন্ধ কৰাৰ ৷ মধ্য ইংৰাজী বিদ্যালয় আৰু প্ৰাথমিক বিদ্যালয় বন্ধৰ সিদ্ধান্ত লৈছে শিক্ষা বিভাগে ৷ জিলাখনৰ ছিপাঝাৰ শিক্ষাখণ্ডত থকা ১৮ খন আৰু কলাইগাঁও শিক্ষা খণ্ডৰ ৭ খন বিদ্যালয় বন্ধ হোৱাৰ ঘোষণা ৷ ইতিমধ্যে এই বিদ্যালয় সমূহৰ পৰা স্থানান্তৰ কৰা হৈছে শিক্ষকসকলক ৷ চৰকাৰে বন্ধ কৰি দিয়া বিদ্যালয় সমূহৰ তালিকাত আছে ২০১৭ চনত গুণোৎসৱত ৯৯.৪০ % নম্বৰ লাভ কৰা তথা অসমৰ ভিতৰত সৰ্বোচ্চ তালিকাত থকা দগীয়াপাৰা বান্দৰীঝাৰ প্ৰাথমিক বিদ্যালয়খনো ৷
সম্পূৰ্ণ আন্ত:গাঠনি থকাৰ পিছতো শিক্ষা বিভাগে লৈছে এই সিদ্ধান্ত ৷ যাৰ বাবে এতিয়া জাঙুৰ খাই উঠিছে শিক্ষাৰ্থীসকলৰ অভিভাৱকৰ লগতে বহু দল-সংগঠন ৷ একাংশৰ মন্তব্য যদি এই বিদ্যালয়সমূহত উন্নত শিক্ষাৰ ব্যৱস্থা নাই তেন্তে বিদ্যলয়সমূহত উন্নত শিক্ষাৰ ব্যৱস্থা কৰক ৷ কিন্তু বিদ্যালয়সমূহ বন্ধ কৰাৰ কোনো প্ৰয়োজন নাই ৷ কিন্তু শিক্ষা বিভাগ নিজৰ সিদ্ধান্তত অটল ৷ বিদ্যালয়সমূহত নাই কোনো শিক্ষক ৷ বৰ্তমান বিদ্যালয়সমূহ পৰিণত হৈছে ভূত বাংলাত ৷ ইফালে,বহু শিক্ষাৰ্থী বেচৰকাৰী বিদ্যালয়লৈ গতি কৰিছে যদিও আন বহু শিক্ষাৰ্থী বিদ্যালয়লৈ যাব পৰা নাই ৷ যাৰ ফলত শিক্ষাৰ্থীসকলৰ ভৱিষ্যতক লৈ চিন্তিত হৈ পৰিছে অভিভাৱকসকল ৷
