দলগাঁও, ২জুন : ৰাজ্যজুৰি কৰ'ণাৰ সংক্ৰমণ অব্যাহত আছে । যাৰ বাবে সমগ্ৰ অসমতে সান্ধ্য আইন জাৰি ৰাখিছে প্ৰশাসনে । কিন্তু ইয়াৰ ফলত চৰম বিপদৰ সন্মুখীন হৈছে পদপথত বাস কৰা একাংশ অঘৰী । হোটেল, ৰেষ্টুৰেন্ট আদি বন্ধ হৈ থকাত এমুঠি অন্নৰ বাবে হাহাকাৰ কৰিবলগীয়া হৈছে অঘৰীসকলে ।
ইয়াৰ মাজতে দৰঙৰ খাৰুপেটীয়াত এক বিশেষ দৃশ্য বন্দী হৈছে ইটিভি ভাৰতৰ কেমেৰাত । ক্ষুধা নিবাৰণৰ বাবে এগৰাকী অঘৰীয়ে খাদ্য বিচাৰিছে ডাষ্টবিনত । ডাষ্টবিনৰ পৰা একাংশ লোকে খাই পেলাই দিয়া থালবোৰ বুটলি তাৰ পৰা অখাদ্য গ্ৰহণ কৰিছে । এই দৃশ্যই এতিয়া সকলোকে মৰ্মাহত কৰি তুলিছে ।
কৰ'ণাই কি দৰে মানুহৰ জীৱনত প্ৰভাৱ পেলাইছে এই দৃশ্য দেখাৰ পিছত সকলোৱে ভাবিবলৈ বাধ্য হ'ব । বহু ঠাইত যদিও পদপথৰ লোকক বিভিন্ন জনে খাদ্য যোগান ধৰিছে কিন্তু খাৰুপেটীয়াৰ এইজনৰ বাবে কেৱল জীয়াই থাকিবলৈ এমুঠি অন্নৰ বাবে হাহাকাৰ কৰিবলগীয়া হৈছে ।
লগতে পঢ়ক:ৰাইজৰ প্ৰচেষ্টাত প্ৰাণ পাই উঠিল এটা পানী যোগান আঁচনি