দৰঙৰ বান পৰিস্থিতিৰ পৰ্যবেক্ষণ মুখ্যমন্ত্ৰী সোণোৱালৰ

মুখ্যমন্ত্ৰী সোণোৱালে মথাউৰিৰ ওপৰতে জলসম্পদ বিভাগ আৰু জিলা উপায়ুক্তৰ সৈতে আলোচনাত মিলিত হৈ ব্যৱস্থা গ্ৰহণৰ বাবে উপায়ুক্তক নিৰ্দেশ দিয়ে ৷

দৰং, 23 জুলাইঃ বৃহস্পতিবাৰে দৰং জিলাৰ বান পৰিস্থিতিৰ বুজ লোৱাৰ উদ্দেশ্যেৰে দলং জিলাত উপস্থিত হয় অসমৰ মুখ্যমন্ত্ৰী সৰ্বানন্দ সোণোৱাল ৷ তিনিমান বজাত মুখ্যমন্ত্ৰী গৰাকী মঙলদৈত উপস্থিত হৈ মঙলদৈ ৰাজহ চক্ৰৰ অন্তৰ্গত কবিকাৰা গাঁৱৰ ভগ্ন মাথাউৰি পৰিদৰ্শন কৰে ৷ ভূটানৰ পৰা নামি অহা পানীৰ ফলত শাকতোলা নৈয়ে অঞ্চলটোত মাথাউৰিটো চিঙি নিছিল ৷

মুখ্যমন্ত্ৰী সোণোৱালে মথাউৰিৰ ওপৰতে জলসম্পদ বিভাগ আৰু জিলা উপায়ুক্তৰ পৰা মথাউৰিটোৰ অন্যান্য অংশৰ ক্ষমতা সম্পৰ্কে বুজ লয় আৰু ল’ব লগীয়া সাৱধানতাৰ বিষয়ে আলোচনা কৰি প্ৰয়োজনীয় ব্যৱস্থা গ্ৰহণ কৰিবলৈ নিৰ্দেশ দিয়ে ৷

সাহায্যৰ ক্ষেত্ৰত কোনো লোক বা বিভাগে দুৰ্নীতি কৰিলে কোনো কাৰণতে সহ্য কৰা নহ'ব বুলি মুখ্যমন্ত্ৰী গৰাকীয়ে প্ৰকাশ কৰে ৷ ইপিনে ৰাইজে বহু কেইটা বিপদৰ মাজতো মনোবল হেৰুওৱা নাই বুলি তেওঁ প্ৰকাশ কৰি ৰাইজক ধন্যবাদ দিয়ে ৷ আনহাতে সাংবাদিক সকলে বিপদৰ সময়ত ত্যাগ আৰু কষ্টৰে সংবাদ প্ৰদান কৰি ৰাইজক সচেতন কৰাৰ লগতে কেতবোৰ বিষয় চৰকাৰক অৱগত কৰাৰ বাবে সাংবাদিক সকলকো ধন্যবাদ জ্ঞাপন কৰে ৷

ইয়াৰ পাচতে মুখ্যমন্ত্ৰী গৰাকীয়ে মঙলদৈ চহৰৰ মহৰ্ষি বিদ্যা মন্দিৰৰ বান সাহাৰ্য শিবিৰ পৰিদৰ্শন কৰে ৷ তাৰ পাচতে তেওঁ এখন পৰ্যালোচনা সভাতো অংশগ্ৰহণ কৰে ৷

মুখ্যমন্ত্ৰীৰ সৈতে উপস্থিত থাকে জলসম্পদ মন্ত্ৰী কেশৱ মহন্ত,মংগলদৈ লোকসভা সমষ্টিৰ সাংসদ দিলীপ শইকীয়া,ছিপাঝাৰ বিধানসভা সমষ্টিৰ বিধায়ক বিনন্দ কুমাৰ শইকীয়া,মঙলদৈৰ বিধায়ক গুৰুজোতি দাস আৰু জিলা উপায়ুক্ত দীলিপ কুমাৰ বৰা ৷

লগতে পঢ়কঃ অসমৰ বান সমস্যা নিৰ্মূলৰ বাবে 346 কোটি টকা অনুদানৰ ঘোষণা কেন্দ্ৰৰ