চিৰাং, 11 ছেপ্টেম্বৰ : বিটিচি নিৰ্বাচনৰ দিন ঘোষণা হোৱা নাই যদিও ৰাজনৈতিক দল সমুহৰ নিৰ্বাচনী কুচকাৱাজ যুদ্ধকালিন তৎপৰতাৰে চলি আছে । চিৰাং জিলাৰ ১৬ নং নিচিমা পৰিষদীয় সমষ্টিৰ ইউপিপিএল দলৰ প্ৰাৰ্থী নিৰ্মল কুমাৰ ব্ৰহ্মৰ এক নিৰ্বাচনী সভা অনুষ্ঠিত হয় কয়লাময়লা বজাৰ প্ৰেক্ষাগৃহত । ইউপিপিএল দলৰ এজন সম্পাদক তথা বড়ো বোলছবিৰ খুহুতীয়া অভিনেতা ফৈলা জে বৰগয়াৰী, যুৱ ইউপিপিএলৰ সভাপতি সোমনাথ নাৰ্জাৰীসহ চিৰাং, বিজনীকে ধৰি কেইবাখনো জিলা সমিতিৰ নেতৃত্ব উপস্থিত থাকে এই সভাত । বিভিন্ন জাতি-জনগোষ্ঠীৰ সহস্ৰাধিক লোকে অংশ গ্ৰহণ কৰে নিৰ্বাচনী সভাখনত ।
পুৱা দহ বজাৰ পৰা আৰম্ভ হোৱা নিৰ্বাচনী সভাত ভাষণ দি ইউপিপিএল দলৰ সম্পাদক তথা বড়ো বোলছবিৰ খুহুতীয়া অভিনেতা ফৈলা জে বৰগয়াৰীয়ে কয়, ‘‘মই অভিনেতা হিচাবে এয়ালৈ অহা নাই ; দলৰ এজন সম্পাদক হিচাবেহে মই আহিছো ৰাইজৰ মাজলৈ । এয়া মোৰ কাৰণে ভাল হৈছে, কাৰণ ৰাইজে মোক ভালদৰে চিনি পায় । মই বিটিচিৰ সকলো সমষ্টি ঘুৰি ৰাইজৰ সৈতে আলোচনা কৰি বুজি পাইছো, ৰাইজে পৰিৱৰ্তন বিচাৰি ইউপিপিএলক সমৰ্থন কৰি ওলাই আহিছে । সেয়ে আমি নিশ্চিত যে 27 ৰ পৰা 30 আসন লাভেৰে ইউপিপিএল দলে বিটিচিৰ পৰিষদ গঠন কৰিব ’’ ।
বিটিচিত পৰিৱৰ্তনৰ বাবে ৰাইজে সহায় কৰিবলৈ আগবাঢ়ি অহাত ৰাইজক ধন্যবাদ জনায় অভিনেতাজনে । লগতে তেওঁ কলে, পৰিবৰ্তন বিচাৰি আজি সকলোৱে ওলাই আহিছে । কাৰণ বিগত ১৭ টা বছৰে বিপিএফ দলে সকলো ক্ষেত্ৰতে দুৰ্নীতি, ভ্ৰষ্টাচাৰৰে বিটিচি ধ্বংস কৰিবলৈ ওলাইছিল ; সেয়ে আজি ৰাইজে পৰিৱৰ্তন বিচাৰি ওলাই আহিছে ।
ইউপিপিএল দলৰ নিচিমা সমষ্টিৰ প্ৰাৰ্থী নিৰ্মল কুমাৰ ব্ৰহ্মই কয় যে, সকলো ঠিকে ঠাকে চলি আছে আৰু প্ৰায় দহ-এঘাৰ হেজাৰ ভোটৰ ব্যৱধানত জয়ী হ’ব তেওঁ । বিগত সময়ছোৱাত বিপিএফ দলৰ দুৰ্নীতি আৰু অপশাসনৰ পৰা মুক্তি বিচাৰি ইউপিপিএল দললৈ ৰাইজৰ সোঁত বৈছে বুলি কয় প্ৰাৰ্থী নিৰ্মল কুমাৰ ব্ৰহ্মই ।
লগতে পঢ়ক : 12 ছেপ্তেম্বৰৰ পৰা উত্তৰ-পূৱ সীমান্ত ৰে’লৱেই চলাব 12 খন যাত্ৰীবাহী ৰে’ল
