বঙাইগাঁও , 23 জানুৱাৰীঃ বঙাইগাঁও জিলাৰ যোগীঘোপাৰ তামৰঙা-দলনী ভোগালী মহোৎসৱৰ নামত আয়োজকৰ ওপৰত প্ৰৱঞ্চনাৰ অভিযোগ উত্থাপন কৰিছে সাধাৰণ ৰাইজে ৷ স্থানীয় ৰাইজৰ ভাষ্য অনুসৰি আধাতে মহোৎসৱ বন্ধ কৰি পলায়ন কৰিছে তামৰঙা-দলনী ভোগালী মহোৎসৱৰ আয়োজকে ৷ দৰাচলতে এই মহোৎসৱত নৌকা বিহাৰ, হাতী চাফাৰি, ঘোৰা চালনা, সাংস্কৃতিক অনুষ্ঠান, জনগোষ্ঠীয় কলা-কৃষ্টি প্ৰদৰ্শন, থলুৱা খাদ্য সামগ্ৰীৰ ব্যৱস্থা আদি বিশেষ আকৰ্ষণ হিচাপে ব্যাপকভাৱে প্ৰচাৰ চলাইছিল আয়োজকে। কিন্তু মহোৎসৱত প্ৰকৃত ৰূপত আছিল এখন সাধাৰণ মঞ্চৰ লগতে তোৰণ ৷
মহোৎসৱত নাছিল কোনো ধৰণৰ নৌকা বিহাৰৰ ব্যৱস্থা হাতী চাফাৰিৰ বাবে নাছিল হাতী, ঘোঁৰা চালনাৰ বাবে এটা ঘোঁৰাও মজুত নাছিল মহোৎসৱস্থলীত ৷ ইয়াৰোপৰি কোনো ধৰণৰ সাংস্কৃতিক অনুষ্ঠান, জনগোষ্ঠীয় কলা-কৃষ্টি প্ৰদৰ্শন বা থলুৱা খাদ্য সামগ্ৰী উপলব্ধ নাছিল এই ভোগালী মহোৎসৱত ৷ জানিব পৰা মতে, ১৩ জানুৱাৰীৰ পৰা ২২ জানুৱাৰীলৈ তামৰঙা বিলৰ পাৰত আয়োজন কৰা হৈছিল তামৰঙা-দলনী ভোগালী মহোৎসৱৰ ৷ কিন্তু ১৬ জানুৱাৰীতহে আৰম্ভ হৈছিল এই মহোৎসৱ।
লগতে পঢ়কঃ প্লাষ্টিকৰ বিৰুদ্ধে বিজয়ৱাড়াৰ কনকা দূৰ্গা ইন্দ্ৰকীলাদ্ৰি মন্দিৰ কৰ্তৃপক্ষৰ কঠোৰ নিৰ্দেশাৱলী
উল্লেখ্য যে, চিৰাঙৰ দৈজিং উৎসৱৰ লগত সংগতি ৰাখি এই মহোৎসৱৰ আয়োজন কৰা হৈছিল যদিও বাস্তৱত একোৱেই নকৰিলে আয়োজকসকলে ৷ ফলত বিমুখ হৈ উভটিব লগা হৈছে মহোৎসৱলৈ অহা পৰ্যটক ৷ ইয়াৰোপৰি বহু পৰিমাণে লোকচানৰ সমুখীন হৈছে মহোৎসৱত দোকান দিবলৈ যোৱা ক্ষুদ্ৰ ব্যৱসায়ীসকল ৷ আনহাতে তামৰঙা-দলনী মহোৎসৱ আয়োজকৰ এই প্ৰৱঞ্চনাত লজ্জানত সাঁকোমূৰা আৰু যোগীঘোপাবাসী ।
