চিৰাং, 2 জানুৱাৰীঃ সেনা-আৰক্ষীৰ যৌথ অভিযানত চিৰাং জিলাৰ ৰুনিখাতা থানাৰ বেংতল আৰক্ষী চকীৰ অন্তৰ্গত বেংতলৰ আই নদীৰ পাৰত মাৰনাস্ত্ৰ সহ গ্ৰেপ্তাৰ দুই এন ডি এফ বি (স্বা)ৰ লিংকমেন ৷ পহিলা জানুৱাৰীৰ নিশা চলা অভিযানত দুই সন্দেহজনক লোকক আটক কৰাৰ পিচতে তেওঁলোকক তালাচী চলোৱাত উদ্ধাৰ হয় ইংলেণ্ডত নিৰ্মিত এটা পিষ্টল সহ চাৰিজাই সঁজীৱ গুলি ৷ পৰৱৰ্তী সময়ত লোক দুজনক আৰক্ষীয়ে অধিক সোধপোচ কৰাৰ পাছতে নিষিদ্ধ উগ্ৰপন্থী সংগঠন এনডিএফবিৰ সদস্য বুলি স্বীকাৰ কৰে লোক দুজনে ৷
আৰক্ষীয়ে প্ৰকাশ কৰা অনুসৰি গ্ৰেপ্তাৰ হোৱা সদস্য দুজন ক্ৰমে ৰুনিখাতা শান্তিপাৰাৰ ছানছুমা মুচাহাৰী আৰু ৰুনিখাতা বিশপানীৰ পেট্ৰুচ নাৰ্জাৰী ৷ উল্লেখ্য যে, গ্ৰেপ্তাৰ হোৱা লোক দুজনৰ বিৰুদ্ধে ৰুনিখাতা থানাত ভাৰতীয় দণ্ডবিধিৰ অধীনৰ ধাৰা 120B, 121/122/384 ত গোচৰ পঞ্জীয়ন হোৱাৰ লগতে বেআইনীভাৱে মাৰনাস্ত্ৰ ৰখাৰ বাবে সংযুক্ত ধাৰা ১০/১৩,২৫ (1B) অধীনত ৰুজু হৈছে গোচৰ ৷ দুয়োজন লোকেই উগ্ৰপন্থী সংগঠনটোৰ হৈ কাম কৰিছিল বুলিয়ো প্ৰকাশ কৰে ৷
উল্লেখ্যনীয় যে চিৰাঙত চলি থকা দৈজিং উৎসৱ আৰু ইয়ালৈ অহা বিভিন্ন নেতা-মন্ত্ৰী আদিৰ লগতে নৱবৰ্ষৰ বিভিন্ন অনুষ্ঠানৰ বাবে জিলাখনত কটকটীয়া নিৰাপত্তা গঢ়ি তুলিছিল আৰক্ষীয়ে । অহা পাঁচ জানুৱাৰীত দৈজিং উৎসৱ ভ্ৰমন কৰিব মুখ্যমন্ত্ৰী সৰ্বানন্দ সোণোৱালে ৷ ইয়াৰ পূৰ্বেই এনেদৰে মৰাণাস্ত্ৰ সহ নিষিদ্ধ সংগঠনৰ লিংকমেন গ্ৰেপ্তাৰৰ ঘটনাই সৃষ্টি কৰিছে ব্যাপক চাঞ্চল্যৰ ৷
লগতে পঢ়ক: ত্ৰিপুৰা আৰক্ষীৰ অভিযানত আটক তিনি দুধৰ্ষ উগ্ৰপন্থী
