চিৰাং, 23 নৱেম্বৰঃ শনিবাৰে গঠন কৰা হ’ল গণ সুৰক্ষা পাৰ্টীৰ চিৰাং আৰু বিজনী জিলা সমিতি ৷ গণ সুৰক্ষা পাৰ্টীৰ সাধাৰণ সম্পাদক আব্দুল বাদশ্বাহৰ সভাপতিত্বত অনুষ্ঠিত সভাত শ্বহিদুল ইছলামক সভাপতি আৰু মনোৰঞ্জন বৰ্মনক সাধাৰণ সম্পাদক হিচাপে লৈ চিৰাং জিলা সমিতি গণ সুৰক্ষা পাৰ্টী গঠন কৰা হয় ৷ উক্ত সভাখনত উপস্থিত থাকে কোকৰাঝাৰ লোকসভা সমষ্টিৰ সাংসদ নৱকুমাৰ শৰণীয়া ৷ সভাত ভাষণ প্ৰদান কৰি সাংসদগৰাকীয়ে কয় যে,"চিৰাঙত এতিয়াও উগ্ৰপন্থীৰ ভয় ভাবুকি আছে । ৰাইজে অবড়ো সুৰক্ষা সমিতিৰ সভালৈ আহিবলৈ ভয় কৰে যদিও ভোটটো অবড়ো প্ৰাৰ্থীকেই দিয়ে ৷" লগতে সাংসদগৰাকীয়ে ইউ টি চি গঠন কৰাৰ বিৰোধিতা কৰি কয় যে,বিটিচিত বাস কৰা অবড়ো লোকৰ সংখ্যা অধিক ৷ কিন্তু ইউ টি চিৰ গঠনৰ সময়ত অবডো় লোকৰ পৰা কোনো ধৰণৰ মতামত গ্ৰহণ কৰা হোৱা নাই লগতে অবড়ো সুৰক্ষা সমিতিকো এই ক্ষেত্ৰত উপেক্ষা কৰি কেৱল বড়ো সংগঠনৰ সৈতেহে আলোচনা কৰিছে বিটিচি প্ৰধানগৰাকীয়ে ৷
আনহাতে,ছয় জনগোষ্টীৰ জনজাতিকৰণৰো দাবী জনায় সাংসদ নৱ শৰণীয়াই ৷ লগতে এই ক্ষেত্ৰত কেন্দ্ৰীয় মন্ত্ৰী অৰ্জুন মুণ্ডাৰ সৈতেও আলোচনা কৰা বুলি জানিবলৈ দিয়ে সাংসদগৰাকীয়ে ৷ উল্লেখ্য যে,এইবাৰ বিটিচি নিৰ্বাচনত গণ সুৰক্ষা পাৰ্টীয়ে নিশ্চিত ভাৱে ৩৫ খন আসন লাভ কৰিব আৰু বিটিচিৰ পৰিষদীয় চৰকাৰ গঠন কৰিব পাৰিব বুলি নিশ্চয়তা প্ৰদান কৰে অবড়ো সুৰক্ষা সমিতিৰ সভাপতি ললিত হেম্ব্ৰমে ৷
