চিৰাঙৰ বিজনীত উপস্থিত চি পি আই (এম)ৰ প্ৰাৰ্থী বিৰাজ ডেকা

বিজেপি আৰু তেওঁলোকৰ সহযোগী দলক পৰাস্ত কৰা, নিবনুৱা সমস্যা সমাধানৰ ক্ষেত্ৰত পদক্ষেপ গ্ৰহণ কৰা, ধৰ্ম নিৰপেক্ষ গণতান্ত্ৰিক চৰকাৰ গঠন কৰাৰ দিশত গুৰুত্ব আৰোপ কৰাৰ লক্ষ্যৰে নিৰ্বাচনত অৱতীৰ্ণ কোকৰাঝাৰৰ প্ৰাৰ্থী বিৰাজ ডেকা

চিৰাং, 30 মাৰ্চঃসমাগত লোকসভাৰ নিৰ্বাচনৰ দিন চমু চাপি অহাৰ লগে লগে তৎপৰতা বৃদ্ধি পাইছে ৰাজনৈতিক দল সমূহৰ মাজত ৷ শনিবাৰে সন্ধিয়া চি পি আই (এম)ৰ প্ৰাৰ্থী বিৰাজ ডেকাই বিজনী চহৰৰ দলীয় কাৰ্যালয়ত উপস্থিত হৈ অংশগ্ৰহণ কৰে এক দলীয় সভাত ৷ দলীয় সভাত অংশগ্ৰহণ কৰিয়েই বিজেপি আৰু তেওঁলোকৰ সহযোগী দলক পৰাস্ত কৰা, নিবনুৱা সমস্যা সমাধানৰ ক্ষেত্ৰত পদক্ষেপ গ্ৰহণ কৰা, ধৰ্ম নিৰপেক্ষ গণতান্ত্ৰিক চৰকাৰ গঠন কৰাৰ দিশত গুৰুত্ব আৰোপ কৰাৰ কথা উল্লেখ কৰে প্ৰাৰ্থীগৰাকীয়ে ৷

ইপিনে, এইবাৰ নিৰ্বাচনত দলটোৱে কোকৰাঝাৰ আৰু লখিমপুৰ লোকসভা সমষ্টিতহে দলীয় প্ৰাৰ্থী থিয় কৰোৱা হৈছে বুলি প্ৰকাশ কৰে দলৰ ৰাজ্যিক সদস্য গজেন্দ্ৰ বৰ্মণে ৷ এন ডি এ চৰকাৰ খনক ক্ষমতাৰ পৰা অপসাৰণৰ বাবে ৰাইজক অহ্বান জনোৱাৰ লগতেসদনত বামপন্থী সদস্য বৃদ্ধি কৰি শ্ৰমিক, কৃষক, শ্ৰমজীৱী জনগণ, মধ্যবিত্ত, মহিলা সকলোৰে গণতান্ত্ৰিক আন্দোলন সম্প্ৰসাৰিত কৰা আৰু কেন্দ্ৰত এখন ধৰ্ম নিৰপেক্ষ চৰকাৰ গঠন কৰাৰ স্বাৰ্থতেই দলে প্ৰাৰ্থী থিয় কৰোৱা বুলি মন্তব্য দলটোৰ ৰাজ্যিক সম্পাদক নয়ন ভূঞাৰ ৷ লগতে উচ্চ শিক্ষিত, কবি- সাহিত্যিক, ছাত্ৰ নেতা 26 বছৰীয়া দেশৰ সৰ্বকনিষ্ঠ দলৰ প্ৰাৰ্থী বিৰাজ ডেকাক ৰাইজক জয়ী কৰিবলৈ আহ্বান জনায় ৷