চিৰাং, 12 মাৰ্চ : বৃহস্পতিবাৰে চিৰাং জিলাৰ গৰুভাষা ৰাজহুৱা পথাৰত ইউপিপিএল দলৰ বৃহৎ যোগদান সমাৰোহৰ আয়োজন কৰে য'ত এনডিএফবিৰ প্ৰাক্তন কৰ্মকৰ্তাসকলৰ লগতে বিপিএফৰ মুঠ এহাজাৰ জন লোকে আনুষ্ঠানিকভাৱে ইউপিপিএল দলত যোগদান কৰে । এই যোগদান সমাৰোহত দলটোৰ প্ৰতিষ্ঠাপক সভাপতি উৰ্খাউ গৌৰা ব্ৰহ্ম, দলৰ সভাপতি প্ৰমোদ বড়োকে আদি কৰি বহু কেইজন নেতা উপস্থিত থাকে ৷
দলৰ সভাপতি প্ৰমোদ বড়োয়ে কয় যে ইউপিপিএল দলে ইতিমধ্যে নিৰ্বাচনৰ বাবে প্ৰস্তুত হৈছে । দুই এদিনতে সম্পূৰ্ণ প্ৰাৰ্থী তালিকা প্ৰকাশ কৰিব বুলি জনায় । ইউপিপিএল দলৰ কাৰ্যালয় জ্বলাই একো কৰিব নোৱাৰে । দুষ্কৃতিকাৰীক দমন কৰিব জানো বুলি কোৱাৰ লগতে কয় যে আমি কোনো ধৰনৰ সংঘৰ্ষ নিবিচাৰো ।
অনুষ্ঠানত উপস্থিত থকা এনডিএফবিৰ প্ৰাক্তন সম্পাদক বি আৰ ফেৰেঙ্গাই কয় এইবাৰ বিপিএফৰ বেয়াকৈ পৰাজয় হোৱাটো নিশ্চিত । ৰাইজে পৰিৱৰ্তন বিচাৰি আছে । গতিকে বিপিএফ এইবাৰ শূন্য হ'ব । দুৰ্নীতিৰ বাবে আজি বিপিএফৰ সৈতে কোনো দলেই থাকিব বিচৰা নাই । তেওঁ কয় যে মই শিলৰ সৈতে খেলি ভাল পাঁও । গতিকে বিটিচিৰ উপ মুখ্য খাম্পা বৰগয়াৰীৰ বিৰুদ্ধে নিৰ্বাচন খেলিম আৰু তেওঁৰ বিজয় নিশ্চিত বুলি জনায় ।
বিটিচিৰ নিৰ্বাচনৰ অধিসূচনা জাৰী কৰাৰ 24 ঘন্টা পাৰ নহওঁতেই নিৰ্বাচনী হিংসাৰ আৰম্ভ হৈছে আৰু ইতিমধ্যে চিৰাঙকে আদি কৰি অন্যান্য ঠাইতো ইউপিপিএল দলৰ কাৰ্যালয় জ্বলোৱা পৰিলক্ষিত হৈছে । কিমান শান্তিপূৰ্ণভাৱে পাৰ হয় নিৰ্বাচন সেয়াহে লক্ষ্যনীয় হ'ব ।
