চিৰাং, 21 নৱেম্বৰ : বিটিচিৰ পোন্ধৰ বছৰীয়া শাসনভাৰ চলোৱা বি পি এফ দলে সম্প্ৰতি নিজৰ দলৰ সাংগঠনিক দিশটো শক্তিশালী কৰাৰ বাবে তৎপৰতা বৃদ্ধি কৰা পৰিলক্ষিত হৈছে ৷ চিৰাং জিলা বিপিএফ দলে শনিবাৰে কাজলগাঁৱস্থিত জিলা কাৰ্যালয়ত এক দলীয় কৰ্মশালা (BPF party workshop) অনুষ্ঠিত কৰে ৷
চিৰাং জিলা বিপিএফৰ সভাপতি পানীৰাম ব্ৰহ্মৰ সভাপতিত্বত অনুষ্ঠিত দলীয় কৰ্মশালাত দলৰ কেন্দ্ৰীয় সভাপতি তথা বিটিচিৰ প্ৰাক্তন মূৰব্বী হাগ্ৰামা মহিলাৰী (Hagrama Mohilary) মুখ্য অতিথি ৰূপে উপস্থিত থাকে ৷ দলীয় কৰ্মশালাত দলটোক ভৱিষ্যতে কেনেদৰে আগুৱাই নিব তাৰ ওপৰত দলীয় প্ৰতিনিধি সকলে নিজৰ মত প্ৰকাশ কৰে ৷
কৰ্মশালাত বিটিচিৰ বিধায়িনী দলৰ বিৰোধী নেতা, পৰিষদীয় সদস্য দেৰহাসাৎ বসুমতাৰীয়ে সম্প্ৰতি দলে গ্ৰহণ কৰা কাৰ্যপন্থাৰ ওপৰত বিশদভাৱে আলোচনা আগবঢ়ায় ৷ বড়োলেণ্ড পিপুলচ ফণ্ট (Bodoland People's Front) চমুকৈ বিপিএফৰ কেন্দ্ৰীয় সভাপতি হাগ্ৰামা মহিলাৰীয়ে দলীয় কৰ্মী সকলক অনাগত দিনত দলীয় কামত সহায়-সহযোগিতা কৰিবলৈ আহ্বান জনায় ৷
সংবাদ মাধ্যমৰ আগত হাগ্ৰামা মহিলাৰীয়ে বৰ্তমান বিটিচি প্ৰশাসনৰ দায়িত্বত থকা প্ৰমোদ বড়োৱে 10/11 মাহৰ কাৰ্যকালত কিমান কাম কৰিলে আৰু কিমান কাম নকৰিলে তাৰ এক আভাস দলীয় প্ৰতিনিধি সকলৰ আগত দাঙি ধৰে বুলি মন্তব্য কৰে ৷ বিজেপিৰে মিত্ৰতা সন্দৰ্ভত তেওঁ কয় যে, দলে কেতিয়াও বিজেপিৰ সভাপতি বা আন কাৰো লগতে কোনো আলোচনা কৰা নাই ৷ মুখ্যমন্ত্ৰীৰ নিৰ্দেশ অনুসৰি কেৱল কাম কৰি যোৱাৰ কথাহে তেওঁ কয় ৷
উচ্ছেদ সম্পৰ্কে মত প্ৰকাশ কৰি তেওঁ কয় বিটিচিত 2003 চনৰ 10 ফেব্ৰুৱাৰীৰ পাচত অহা কোনো লোকেই বৈধ নহয় ৷ চিৰাং জিলাত চিৰাং সংৰক্ষিত বনাঞ্চল সম্প্ৰতি বহু লোকৰ দ্বাৰা বেদখল হোৱা বিষয়ত হাগ্ৰামা মহিলাৰীৰ ভাষ্য যে তেওঁৰ শাসন কালত এনে বেদখল হোৱা নাছিল ৷ এই দিশত বিটিচিৰ মুখ্য কাৰ্যবাহী সদস্য প্ৰমোদ বড়ো আৰু বন বিভাগৰ কাৰ্যবাহী সদস্য ৰঞ্জিত বসুমতাৰীয়ে উচ্ছেদৰ দায়িত্ব ল'ব লাগিব বুলি সংবাদ মাধ্যমৰ আগত প্ৰকাশ কৰে ৷ কিন্ত উচ্ছেদক বিপিএফ দলে সমৰ্থন নকৰে বুলি স্পষ্ট কৰি দিয়ে মহিলাৰীয়ে ৷
লগতে চাওক : New Rules of CAA : অতি শীঘ্ৰে আহিব CAAৰ নতুন নিয়ম
