চিৰাং, 2 জুলাইঃ অসমৰ ছয় জনগোষ্ঠীৰ জনজাতিকৰণৰ প্ৰসংগত সংসদত জনজাতি পৰিক্ৰমা মন্ত্ৰী অৰ্জুন মুণ্ডাৰ মন্তব্যত আদিবাসী আৰু কোচ ৰাজবংশী সংগঠনসমূহৰ তৰফৰ পৰা তীব্ৰ প্ৰতিক্ৰিয়া ব্যক্ত কৰিছে ৷ আদিবাসী সংগঠনসমূহৰ যৌথ মঞ্চ আদিবাসী জাতীয় মহাসভাৰ সম্পাদক বীৰ সিং মুণ্ডাই নিৰ্বাচনৰ সময়ত জনজাতিকৰণৰ প্ৰতিশ্ৰুতি দি ক্ষমতালৈ অহাৰ পিছতে বিজেপি নেতৃত্বাধীন চৰকাৰখনে প্ৰতাৰণা কৰাৰ কথা পুনৰ প্ৰমাণিত হোৱা বুলি মন্তব্য কৰে ৷ ইফালে আক্ৰাছুৰ সম্পাদক গোকুল বৰ্মনে চৰকাৰৰ শেহতীয়া স্থিতিক সমালোচনা কৰে ৷
আনহাতে কোচ ৰাজবংশী সংগ্ৰাম সমিতিৰ সভাপতি অতুল ৰায়ে জনজাতি বিষয়কলৈ চৰকাৰে ৰাজনীতি কৰা বুলি সমালোচনা কৰে ৷ অসমৰ ছয় জনগোষ্ঠীৰ জনজাতিকৰণৰ বিষয়টোক লৈ যদি এই দৰে চৰকাৰে বাৰে বাৰে প্ৰতাৰণা কৰি থাকে তেন্তে ভৱিষ্যতে পৰিস্থিতি অধিক ভয়ংকৰ হ'ব বুলি হুংকাৰ দিয়ে ছয় জনগোষ্ঠীৰ নেতৃত্বই ।
