মৰাণত জব্দ সুৰাভৰ্তি ট্ৰাক

অৰুণাচল প্ৰদেশৰ পৰা নাগালেণ্ডলৈ নিয়া অৱস্থাত জব্দ অবৈধ সুৰা ভৰ্তি ট্ৰাক ৷ সুৰাখিনি অবৈধ বুলি স্বীকাৰ ট্ৰাকখনৰ চালকৰ ৷

মৰাণ , 12 চেপ্তেম্বৰঃ চৰাইদেউ জিলাৰ মৰাণহাটত বুধবাৰে আৰক্ষীয়ে জব্দ কৰে এক ট্ৰাক সুৰা ৷ জানিব পৰা মতে, বুধবাৰে নিশা মৰাণহাট আৰক্ষীৰ এটা তহলদাৰী দলে সন্দেহবশত মৰাণ নগৰত এখন ট্ৰাক ৰখাই তালাচী চলায় | আৰক্ষীৰ দলটোৱে ট্ৰাকখন সুৰাৰ কাৰ্টুনেৰে ভৰ্তি হৈ থকা অৱস্থাত দেখি চালকক নথি-পত্ৰ বিচাৰে যদিও কোনো বৈধ নথি-পত্ৰ দিব নোৱাৰাত ট্ৰাকখন থানালৈ আনে ৷ AS02AC1593 নম্বৰৰ ট্ৰাকখনৰ চালক মহম্মদ মঞ্জুৱে (55) আৰক্ষীৰ জেৰাত স্বীকাৰ কৰা মতে সুৰা খিনি অৰুণাচল প্ৰদেশৰ পৰা নাগালেণ্ড অভিমুখে নিয়া হৈছিল ৷ উক্ত ঘটনা সন্দৰ্ভত চৰাইদেউ জিলাৰ আৰক্ষী অধীক্ষক আনন্দ মিশ্ৰই মৰাণহাট আৰক্ষী থানাত উপস্থিত হৈ অধিক তথ্যৰ বাবে গাড়ী চালকজনক জেৰা অব্যাহত ৰাখিছে ।