চৰাইদেউ, ২১ আগষ্ট : অসমৰ মুখ্যমন্ত্ৰী ড: হিমন্ত বিশ্ব শৰ্মাৰ (Himanta Biswa Sarma) নেতৃত্বত অসমত বিজেপি চৰকাৰে ১০০ দিন সম্পূৰ্ণ কৰিলে । ১০০ দিনৰ কাৰ্যকাল সম্পূৰ্ণ হোৱাত চৰকাৰে বিভিন্ন ধৰণৰ কাৰ্যসূচী ৰূপায়ণ কৰা দেখা গৈছে । এই ১০০ দিনত চৰকাৰে কৰা বিভিন্ন উন্নয়নমূলক কাম আৰু ৰাইজৰ সুবিধাৰ্থে গ্ৰহণ কৰা বিভিন্ন আঁচনিসমূহ ৰাইজক জনোৱাৰ উদ্দেশ্যে প্ৰতিখন জিলাতে শাসকীয় দল বিজেপিয়ে লৈছে বিভিন্ন পদক্ষেপ ।
ইয়াৰ মাজতে চৰাইদেউ জিলাতো জিলা প্ৰশাসনে অনিৰুদ্ধ যাত্ৰা (Anirudh Yatra) নামেৰে এক কাৰ্যসূচীৰ আয়োজন কৰে । অনিৰুদ্ধ যাত্ৰা উপলক্ষে উপায়ুক্ত কাৰ্যালয়ৰ সভাকক্ষত শনিবাৰে সন্ধিয়া এক সংবাদ মেল আৰু জিলাখনৰ জ্যেষ্ঠ নাগৰিকসকলৰ সৈতে এক সৌহাদ্যমূলক আলোচনা অনুষ্ঠিত হয় । এই আলোচনাত সোণাৰি সমষ্টিৰ বিধায়ক ধৰ্মেশ্বৰ কোঁৱৰে অংশগ্ৰহণ কৰি আগন্তুক দিনত চৰাইদেউ জিলাক সামাজিক আৰু অৰ্থনৈতিক প্ৰেক্ষাপটত আগুৱাই নিয়াৰ বাবে তেখেতে গ্ৰহণ কৰা পৰিকল্পনা সমূহ উল্লেখ কৰে ।
উক্ত সংবাদমেল তথা আলোচনাত চৰাইদেউ জিলাৰ সংবাদ মাধ্যমৰ বিভিন্ন সংগঠন সমূহৰ বিষয়া প্ৰতিনিধি সকলে বিগত ১০০ টা দিনত চৰকাৰে গ্ৰহণ কৰা পদক্ষেপ সমূহৰ ওপৰত মত ব্যক্ত কৰে । আনহাতে চৰাইদেউ জিলাৰ বিভিন্ন প্ৰান্তৰ বিশিষ্ট নাগৰিকসকলেও উক্ত আলোচনাত অংশগ্ৰহণ কৰি বক্তব্য আগবঢ়ায় । চৰাইদেউ জিলাৰ উপায়ুক্ত (Charaideo District Commissioner) বিনীতা পেগু, আৰক্ষী অধীক্ষক (SP) সুধাকৰ সিঙৰ লগতে চৰাইদেউ জিলা পৰিষদৰ সভানেত্ৰী বন্তি কোঁৱৰেও ভাষণ প্ৰসংগত চৰকাৰখনৰ ১০০ দিনীয়া কাৰ্যকালৰ ওপৰত আলোকপাত কৰে ।
লগতে পঢ়ক :31 আগষ্টৰ ভিতৰত মহানগৰীৰ সকলোকে প্ৰদান কৰা হ'ব ক'ভিড প্ৰতিষেধক: স্বাস্থ্যমন্ত্ৰী
