গুৱাহাটী, 7 মে': আই পি এলত ৰাজস্থান ৰয়েলছ দলৰ হৈ সুন্দৰ প্ৰদৰ্শনেৰে সকলোৰে দৃষ্টি আকৰ্ষণ কৰা অসম সন্তান ৰিয়ান পৰাগে নিজা বাসগৃহত আয়োজন কৰে এক সংবাদমেল ৷ নিজৰ পিতৃক জীৱনৰ আদৰ্শ হিচাপে লোৱা ৰিয়ানে সাংবাদিকৰ বিভিন্ন প্ৰশ্নৰ উত্তৰ দিয়ে ৷ ঘৰুৱা খেল খেলি থকা অৱস্থাৰ পৰাই আই পি এল খেলাৰ সপোন দেখা বুলি তেওঁ জানিবলৈ দিয়ে ৷ ৰাজস্থান ৰয়েলছৰ হৈ খেলিবলৈ পাই উৎফুল্লিত বুলি জনাই 17 বৰ্ষীয় ৰিয়ানে ৷
ষ্টিফ স্মিথৰ দৰে খেলুৱৈৰ সান্নিধ্য লাভ কৰা ৰিয়ানক খেলত কেনেকৈ মনোনিৱেশ কৰিব পাৰি সেই সম্পৰ্কে স্মিথে শিক্ষা দিছিল বুলি জনায় ৷ গামোচাক আন্তৰাষ্ট্ৰীয় পৰ্যায়লৈ লৈ যোৱাৰ প্ৰচেষ্টাৰে নিজৰ লগত এখন গামোচা ৰাখিছিল বুলি তেওঁ সংবাদ মাধ্যমৰ আগত প্ৰকাশ কৰে ৷ অতি কম বয়সতে কেৰিয়াৰৰ এই পৰ্যায়ত উপনীত হ'বলৈ বহু কষ্ট কৰা বুলি জনোৱা ৰিয়ানে পৰিয়ালৰ লগতে সকলোলৈ ধন্যবাদ জ্ঞাপন কৰে ৷ ৰঞ্জী ট্ৰফীৰ বাবে বৰ্তমান অনুশীলন আৰম্ভ কৰিব বুলিও তেওঁ জানিবলৈ দিয়ে ৷
