চিৰাং, ৩ মাৰ্চ: ৰাইজৰ দাবীৰ ফলত পকী দলং নিৰ্মাণ হ’ল যদিও বৰ্তমানলৈকে মুকলি কৰিবলৈহে আহৰি নহ’ল বিভাগীয় কৰ্তৃপক্ষৰ ৷ আমি ক’বলৈ লৈছো চিৰাঙৰ বিজনীৰ এখন দলঙৰ কথা ৷ পকী দলঙৰ কাম সম্পূৰ্ণ হ’ল যদিও কাষতে থকা বাঁহৰ দলঙেৰেই মৰণত শৰণ দি যাতায়ত অব্যাহত ৰাখিছে হাজাৰোধিক লোকে ৷
উল্লেখ্য যে, চিৰাং আৰু বঙাইগাঁও জিলাৰ সীমান্তৱৰ্তী বিজনীৰ ৰাইজৰ দীৰ্ঘদিনীয়া দাবীৰ অন্তত এখন পকী দলং লাভ কৰে যদিও বৰ্তমানলৈকে যাতায়তৰ বাবে মুকলি কৰি নিদিলে দলঙখন ৷ বিগত বহু মাহ ধৰি দলঙখন মুকলি কৰিবলৈ স্থানীয় বিধায়কক দাবী জনাই আহিছে যদিও কোনো ব্যৱস্থা গ্ৰহণ নকৰাৰ অভিযোগ উত্থাপন কৰিছে বিজনী আঞ্চলিক ছাত্ৰ সন্থাই ৷ পকী দলং থকাৰ পাচতো ৰাইজে বাঁহৰ দলঙেৰে বিপদ সংকুল যাত্ৰা কৰিবলগীয়াত বিজনী আঞ্চলিক ছাত্ৰ সন্থাই ক্ষোভ প্ৰকাশ কৰে । জিলা প্ৰশাসনে শীঘ্ৰে ৰাইজৰ যাতায়তৰ বাবে দলঙখন মুকলি নকৰিলে আন্দোলন কাৰ্যসূচী হাতত লোৱাৰ হুংকাৰ আছুৰ ৷
