শিলচৰ,13আগষ্টঃ কৰ'ণা ভাইৰাছৰ ত্ৰাসৰ মাজতে ৰাজ্যজুৰি এতিয়া প্লাজমা দান কৰিবলৈ ওলাই আহিছে বহুজন ৷ কৰ'ণাত আক্ৰান্ত ৰোগীসকল আৰোগ্য লাভ কৰাৰ ক্ষেত্ৰত অতিকে প্ৰয়োজনীয় হৈছে প্লাজমা ৷ যাৰ বাবে চৰকাৰেও ৰাজ্যবাসীক প্লাজমা দান কৰিবৰ বাবে অনুৰোধ জনাইছিল ৷ তেনে সময়তে প্লাজমা দাতাসকলৰ প্ৰতি সন্মান প্ৰদৰ্শন কৰি সোনাই সমষ্টিৰ বিধায়ক তথা অসম বিধানসভাৰ উপাধ্যক্ষ আমিনুল হক লস্কৰে গ্ৰহণ কৰিছে বিশেষ পদক্ষেপ ৷
প্লাজমা দাতাৰ ভৰি ধুলে উপাধ্যক্ষ আমিনুল হক লস্কৰে
বৰাকৰ প্ৰথমজন প্লাজমা দাতা নবিদুল ইছলাম লস্কৰৰ বাসগৃহত আজি উপস্থিত হৈ ভৰি ধুই সন্মান জনালে বিধানসভাৰ উপাধ্যক্ষ আমিনুল হক লস্কৰে ৷ ইয়াৰ উপৰি উপাধ্যক্ষগৰাকীয়ে এখন প্ৰশংসা পত্ৰও উপহাৰ দিয়ে প্লাজমা দাতা নবিদুলক ৷
