শিলচৰ, 31 মাৰ্চ : অসমত ধৰা পৰিলে প্ৰথমগৰাকী কৰ'ণা আক্ৰান্ত ৰোগী ৷ কৰিমগঞ্জ জিলাৰ বদৰপুৰ সমষ্টিৰ হাচনপুৰ গাঁৱৰ কচুয়াদম গাঁৱৰ ৫৫ বছৰীয়া এজন ব্যক্তি দিল্লীৰ নিজামউদ্দিনৰ পৰা ১৩ মাৰ্চত ঘৰত উভতি আহিছিল। ৫ মাৰ্চত দিল্লী গৈছিল লোকজন । তাৰ পৰা উভতি আহি তেওঁ গুৱাহাটীৰ হাতীগাঁৱলৈ গৈছিল ।
কেঞ্চাৰ আৰু ডায়াবিটিছ ৰোগত আক্ৰান্ত এই ব্যক্তিজনে গুৱাহাটীৰ পৰা উভতি অহাৰ পিচত তেওঁৰ ঘৰৰ ওচৰত থকা শ্ৰীগৌৰী হাস্পতালত নিজৰ পৰীক্ষা কৰাইছিল । তাৰ পৰা তেওঁক শিলচৰ মেডিকেল কলেজলৈ পঠোৱা হৈছিল আৰু তাত দুবাৰকৈ পৰীক্ষা কৰোৱা হৈছিল । পিছত পুনাৰ এনআইভি'ত পৰীক্ষা কৰি পজিটিভ পোৱা যায় বুলি শিলচৰ মেডিকেল কলেজৰ অধ্যক্ষ ডাক্তৰ বাবুল কুমাৰ বেজবৰুৱা জনাইছে ।
উল্লেখ্য যে, দিল্লীৰ নিজামউদ্দিনত অনুষ্ঠিত দৰগাহত হোৱা ধৰ্মীয় অনুষ্ঠানত অংশগ্ৰহণ কৰা বহুকেইজন লোক কৰ'ণাত আক্ৰান্ত হোৱাৰ লগতে মৃত্যু হোৱাৰ বাতৰি পোহৰলৈ অহাৰ পাচতে এক আতংকৰ সৃষ্টি হৈছে ৷ অসমৰো বহুসংখ্যক লোক এই অনুষ্ঠানলৈ যোৱাৰ তথ্য ইতিমধ্যে লাভ কৰা হৈছে আৰু তাৰে একাংশ উভতি অহা লোকৰ বৰ্তমানেও কোনো শুংসূত্ৰ পোৱা হোৱা নাই ৷ গতিকে ৰাইজক আতংকিত হোৱাৰ পৰিৱৰ্তে সজাগ হ'বলৈ আহ্বান জনাইছে চৰকাৰ তথা প্ৰশাসনে ৷
লগতে পঢ়ক : অসমত প্ৰথমগৰাকী কৰ'ণা আক্ৰান্ত ব্যক্তি চিনাক্ত : হিমন্ত বিশ্ব শৰ্মা
