শিলচৰ, 25 ডিচেম্বৰঃ পুনৰ বিতৰ্কৰ আৱৰ্তত বৰখলা সমষ্টিৰ প্ৰাক্তন বিধায়িকা ডঃ ৰুমী নাথ ৷ এইবাৰ আৰক্ষী অধীক্ষকৰ কাৰ্যালয়ৰ চৌহদত মাৰপিটৰ ঘটনাৰ লগত জড়িত হোৱাৰ অভিযোগ প্ৰাক্তন বিধায়িকাগৰাকীৰ বিৰুদ্ধে ৷ আনহাতে,বৰখলাৰ একাংশ বিজেপি কৰ্মীৰ ওপৰত জপিয়াই পৰে ৰুমী নাথৰ লগত থকা উদণ্ড যুৱক ৷ বিজেপি কৰ্মীসকলে সংবাদ মাধ্যমৰ আগত কৰা অভিযোগ অনুসৰি বৰখলা জাৰইলতোলাৰ এটা মন্দিৰত কিছুদিন পূৰ্বে সংঘটিত হৈছিল চুৰিকাণ্ড ৷ চুৰি কাণ্ডৰ লগত জড়িত অপৰাধীক গ্ৰেপ্তাৰৰ দাবীত আৰক্ষী অধীক্ষক জগদীশ দাসক লিখিত আবেদন জনাবলৈ কাৰ্যালয়লৈ আহিছিল বৰখলাৰ শতাধিক বিজেপি কৰ্মী ৷ কিন্তু আৰক্ষী বিষয়াৰ সৈতে আলোচনা চলি থকাৰ সময়তেই আকস্মিকভাৱে কাৰ্যালয়ত প্ৰৱেশ কৰে ৰুমী নাথ ৷ তাতেই দুয়ো পক্ষৰ মাজত তৰ্কাতৰ্কি আৰম্ভ হয় ৷ পৰৱৰ্তী সময়ত হতাহতিত লিপ্ত হয় দুয়ো পক্ষ ৷
আনহাতে,বিজেপি কৰ্মী অমল নাথৰ অভিযোগ অনুসৰি,ৰুমী নাথৰ লগত যোৱা মাচুদ বৰভূঁঞা নামৰ যুৱক জনে ৰুমীৰ নিৰ্দেশত প্ৰথমে বিজেপি কৰ্মী অমল নাথক আক্ৰমণ কৰে ৷ বিজেপি কৰ্মী সকলে অমল নাথক ৰক্ষা কৰিবলৈ যোৱাত ৰুমী বাহিনীয়ে বিজেপিৰ কেবাগৰাকী মহিলাক আক্ৰমণ কৰি শ্লীলতা হানি কৰাৰো অভিযোগ উত্থাপন কৰে বিজেপী কৰ্মীগৰাকীয়ে ৷
লগতে পঢ়ক- নাগৰিকত্ব সংশোধিনী আইনক লৈ ৰাজ্যৰ প্ৰান্তে প্ৰান্তে অব্যাহত প্ৰতিবাদ
