কাছাৰ, 15 ফেব্ৰুৱাৰী : কাছাৰত ৰাজ কুমাৰ সিং নামৰ এজন ব্যক্তিৰ অবৈধ ইটা ভাটাৰ বাবে দূৰ্ভোগ ভুগিবলগা হৈছে স্থানীয় ৰাইজে ৷ এই অবৈধ ইটা ভাটাৰ বিৰুদ্ধে স্থানীয় ৰাইজে বহুবাৰ অভিযোগ কৰিছে যদিও ৰহস্যজনকভাবে আৰক্ষী প্ৰশাসনে কোনো ব্যৱস্থা গ্ৰহণ কৰা নাই ৷
কাছাৰ জিলাৰ সোনাই সমষ্টিৰ কাজিডহৰৰ প্ৰিয়া নামৰ ইটা ভাটাটোৰ নিচেই কাষতে থকা লোকসকলে কষ্ট ভূগিব লগা হৈছে ৷ ইটা ভাটাৰ পৰা নিৰ্গত বিষাক্ত দ্ৰব্যৰ পৰা শিশুসকলৰ মাৰাত্মক ৰোগ হোৱাৰ লগতে খোৱা পানী প্ৰদূষণ আৰু শাক-পাচলি নষ্ট হৈ আহিছে ৷ ইয়াৰোপৰি, দিনে-নিশাই ইটা ভাটাৰ কাম চলি থকাৰ বাবে ওচৰৰ পৰিয়ালকেইটাৰ ল'ৰা-ছোৱালী সকলৰো পঢ়া-শুনাত ব্যাঘাত জন্মিছে ৷
স্থানীয় লোকে জানিবলৈ দিয়া অনুসৰি, ইটা ভাটাৰ মালিক ৰাজ কুমাৰক এই সম্পৰ্কত অভিযোগ কৰিলে তেওঁ স্থানীয় লোকক ধমকি দিয়া আৰম্ভ কৰে ৷ সেয়েহে তেওঁলোকে জিলা প্ৰশাসনক এখন লিখিত অভিযোগ দাখিল কৰিছিল যদিও প্ৰশাসনে বৰ্তমানলৈকে কোনো ব্যবস্থা গ্ৰহণ কৰা নাই ৷
এই বিষয় লৈ স্থানীয় পঞ্চায়ত প্ৰতিনিধিয়ে সংবাদ মাধ্যমৰ আগত কয় যে, গাঁৱত কোনো উদ্যোগ স্থাপনৰ পূৰ্বে পঞ্চায়ত প্ৰতিনিধিৰ পৰা আপত্তিবিহীন প্ৰমাণপত্ৰ (No objection certificate) উলিয়াব লাগে ৷ কিন্তু ৰাজ কুমাৰে ইটা ভাটা স্থাপন কৰাৰ পূৰ্বে এনে কোনো প্ৰমাণপত্ৰ উলিওৱা নাই ৷ ৰাজ কুমাৰে সম্পূৰ্ণ অবৈধভাবে এই ইটা ভাটা চলোৱাৰ লগতে ওচৰৰ পৰিৱেশো বিনষ্ট কৰিছে ৷ শীঘ্ৰেই ইয়াৰ বিৰুদ্ধে ব্যৱস্থা গ্ৰহণ কৰিবৰ বাবে তেওঁ প্ৰশাসনক দাবী জনায় ৷
ইপিনে এই সমস্ত বিষয় সন্দৰ্ভত ইটা ভাটাৰ মালিক ৰাজ কুমাৰ সিঙক সংবাদ মাধ্যমে প্ৰশ্ন উত্থাপন কৰিলে তেওঁলোককো দুৰ্ব্যৱহাৰ কৰে বুলি জানিব পৰা গৈছে ৷ ইয়াৰোপৰি ৰাজ কুমাৰ সিঙৰ গুণ্ডাই সংবাদ কৰ্মীসকলক ভাবুকি প্ৰদান কৰে ৷
আৰু পঢ়ক : উত্তৰ-পূৱ ভাৰতৰ CAA বিৰোধী সংগ্ৰাম পৃথক : উপমন্যু হাজৰিকা
