শিলচৰ,১০ মাৰ্চ: প্ৰাৰ্থিত্ব নাপাই এজনৰ পিছত আনজন নেতাই বিজেপি দলত্যাগ কৰাৰ খবৰ আহিছে । এইবাৰ শিলচৰৰ এগৰাকী প্ৰভাৱশালী নেতাই বিজেপি ত্যাগ কৰিলে । সুদীৰ্ঘ ৩৬ বছৰ বিজেপিৰ প্ৰাথমিক সদস্য হিচাপে কাম কৰাৰ লগতে শিলচৰ সমষ্টিৰ দুবাৰৰ বিধায়ক দিলীপ কুমাৰ পালে বিজেপি ত্যাগ কৰিলে । সংবাদমেলযোগে দল ত্যাগৰ ঘোষণা কৰে নেতাগৰাকীয়ে ।
প্ৰাক্তন বিধায়কগৰাকীয়ে উল্লেখ কৰা মতে ইতিমধ্যে বিজেপিৰ ৰাজ্যিক আৰু ৰাষ্ট্ৰীয় সভাপতিলৈ প্ৰেৰণ কৰিছে তেওঁৰ পদত্যাগ পত্ৰ । প্ৰাৰ্থিত্বকেন্দ্ৰিক সংঘাতৰ ফলস্বৰূপে ইতিমধ্যে ৰাজ্যৰ ভিন্ন প্ৰান্তত বিজেপি দলত্যাগ কৰিছে বহু নেতাই । কিন্তু শিলচৰৰ এইগৰাকী চৰ্চিত নেতাই এনেদৰে দলত্যাগ কৰাৰ লগে লগে বিশেষ প্ৰতিক্ৰিয়া দেখিবলৈ পোৱা গৈছে বিজেপিৰ ভিতৰচ'ৰাত ।
