শিলচৰ, 31 জুলাই : অসম-মিজোৰাম সীমান্তৰ লাইলাপুৰত সংঘটিত হোৱা ঘটনাক লৈ ৰাজ্যজুৰি অব্যাহত আছে তীব্ৰ প্ৰতিক্ৰিয়া ৷ ৰাজ্যৰ বিভিন্ন প্ৰান্তত বিভিন্ন দল-সংগঠনে এই ঘটনাক লৈ প্ৰতিবাদ সাব্যস্ত কৰাৰ লগতে উক্ত ঘটনাত জড়িত দোষীক কঠোৰৰ পৰা কঠোৰ শাস্তি প্ৰদান কৰাৰ দাবী উত্থাপন কৰিছে ৷ ইয়াৰ মাজতে সমগ্ৰ ঘটনাটোৰ আঁৰত অন্য ৰাজনীতি জড়িত থকাৰ সন্দেহ প্ৰকাশ কৰিছে ৰাইজৰ দলৰ লগতে কংগ্ৰেছ দলে ৷ ইয়াৰ মাজতে সীমান্ত সমস্যাৰ নেপথ্যত কংগ্ৰেছ দল বুলি মন্তব্য কৰিছে কৃষিমন্ত্ৰী অতুল বৰা (Atul Bora) ই ৷
মন্ত্ৰী অতুল বৰাই শুকুৰবাৰে হাইলাকান্দিত উপস্থিত হৈ এই মন্তব্য কৰে ৷ লগতে সংবাদ মাধ্যমৰ আগত তেঁও মত প্ৰকাশ কৰি কয় যে, কংগ্ৰেছ চৰকাৰেহে অসমত সীমান্ত সমস্যাৰ সৃষ্টি কৰিছিল ৷ কংগ্ৰেছে উত্তৰ পূৰ্বাঞ্চলৰ ৰাজ্য সমূহ গঠন কৰাৰ সময়তে সৃষ্টি কৰিছিলে এই সমস্যা ৷ ৰাজ্যত কংগ্ৰেছ দলৰ চৰকাৰ শাসনত থকাৰ সময়তে প্ৰতিবেশী ৰাজ্যই অসমৰ ভূমি দখল কৰিছিল বুলি মন্তব্য কৰে অগপৰ সভাপতি তথা ৰাজ্য চৰকাৰৰ কৃষি বিভাগৰ মন্ত্ৰী অতুল বৰাই ৷
উল্লেখ্য যে, হাইলাকান্দিত ক'ভিডত স্বামীহাৰা হোৱা 11 গৰাকী মহিলাক ৰাজ্য চৰকাৰ পৰা আৰ্থিক সাহাৰ্য প্ৰদান অনুষ্ঠানত অংশগ্ৰহণ কৰিবলৈ আহি এই মন্তব্য কৰে মন্ত্ৰী অতুল বৰাই ৷
উল্লেখনীয় যে, ৰাজ্যত দীৰ্ঘ 10 বছৰ অগপ চৰকাৰ ক্ষমতাত আছিল আৰু বিজেপিৰ মিত্ৰ হিচাপে আছিলে 5 টা বছৰ ৷ কিন্তু ইয়াৰ পিছতেও কিও তেওঁলোকে সীমান্ত সমস্যা সমাধান কৰিব নোৱাৰিলে বুলি সাংবাদিকে সোধা প্ৰশ্নৰ উত্তৰত মন্ত্ৰী গৰাকীয়ে কয় যে,কংগ্ৰেছ চৰকাৰ শাসনত থকাৰ দিনতহে অধিকাংশ ভূমিৰ বেদখল হৈছিল ৷ লগতে বৰ্তমান ৰাজ্য চৰকাৰে সীমান্ত অঞ্চলৰ উন্নয়নৰ কামত হাত দিয়াৰ বাবেই প্ৰতিবেশী ৰাজ্যৰ বেদখলৰ তথ্য পোহৰলৈ আহিছে বুলি মন্তব্য কৰে মন্ত্ৰী অতুল বৰাই ৷
শুকুৰবাৰে হাইলাকান্দিত ক'ভিড-19 ত স্বামীহাৰা হোৱা 11 গৰাকী বিধবা মহিলাক আহি 2.5 লাখ টকাৰ চেক প্ৰদান কৰা হয় ৷ এই অনুষ্ঠানত মূখ্য অতিথি হিচাপে কৃষি মন্ত্ৰী অতুল বৰা উপস্থিত থকাৰ লগতে উপস্থিত আছিল বন আৰু আবকাৰী বিভাগৰ মন্ত্ৰী পৰিমল শুক্লবৈদ্য ৷
লগতে পঢ়কঃ মিজো আৰক্ষীৰ গুলিত নিহত জোৱানলৈ শ্ৰদ্ধাঞ্জলি অসম আৰক্ষীৰ
