শিলচৰ, 21 চেপ্তেম্বৰ: শিলচৰত আৰম্ভ হ'ল ভাৰত-বাংলাদেশ নাট্য মেলা৷ ত্ৰিপুৰা সহ বিভিন্ন প্ৰদেশৰ শিল্পীৰ লগতে বাংলাদেশৰ 170 জনতকৈও অধিক শিল্পীয়ে অংশগ্ৰহণ কৰিব এই নাট্য মেলাত ৷ সন্মিলিত সাংস্কৃতিক মঞ্চৰ দ্বাৰা আয়োজিত এই অনুষ্ঠানত বন্তি প্ৰজ্বলন কৰে মন্ত্ৰী পৰিমল শুক্লবৈদ্যই৷ লগতে উক্ত অনুষ্ঠানত উপস্থিত থাকে শিলচৰৰ বিধায়ক দিলীপ পাল, উত্তৰ কৰিমগঞ্জৰ বিধায়ক কমলাক্ষ দে পুৰকায়স্থ আৰু বাংলাদেশৰ শিল্পীসকল৷
তিনিদিনীয়া কাৰ্যসূচীৰে অনুষ্ঠিত হোৱা এই নাট্য সন্মিলনত বিভিন্ন সাংস্কৃতিক দলে অনুষ্ঠান পৰিবেশন কৰিব৷ লগতে গুৱাহাটীৰ প্ৰাঞ্জল শইকীয়াৰ দলটোৱেও নাটক পৰিবেশন কৰিব এই নাট্য মেলা অনুষ্ঠানত৷
ইটিভি ভাৰতৰ সৈতে হোৱা এক সাক্ষাৎকাৰত পৰিমল শুক্লবৈদ্যই ভাৰত-বাংলাদেশৰ মাজত এক সু-সম্পৰ্ক গঢ়ি তুলাৰ উদ্দেশ্যেই এই নাট্য মেলাৰ আয়োজন কৰা হৈছে বুলি প্ৰকাশ কৰে৷ লগতে আয়োজকসকলক ধন্যবাদ জ্ঞাপন কৰে পৰিমল শুক্লবৈদ্যই৷
