মাণিকপুৰ, 20 অক্টোবৰ : ৰাজ্যৰ মুখ্যমন্ত্ৰী ড৹ হিমন্ত বিশ্ব শৰ্মাই নিকা প্ৰশাসন তথা চৰকাৰী বিষয়া-কৰ্মচাৰীক নাকি লগাবলৈ বিভিন্ন পদক্ষেপ হাতত লোৱাৰ পিচতো বঙাইগাঁও জিলাৰ সৃজনগ্ৰাম ৰাজহ চক্ৰৰ কাৰ্যালয়ত অব্যাহত অৰাজকতা ৷ লাটমণ্ডলে অধিবক্তাক আক্ৰমণ কৰাৰ গুৰুতৰ অভিযোগ উত্থাপন হৈছে ।
সৃজনগ্ৰাম ৰাজহ চক্ৰ কাৰ্যালয়ৰ 3 নং লাটৰ লাটমণ্ডল ছাইদুৰ ৰহমানৰ বিৰুদ্ধে অধিবক্তা জাহিদুল ইছলামে আক্ৰমণ কৰাৰ অভিযোগ তুলি এজাহাৰ দাখিল কৰিছে ৷ অৱশ্যে এজাহাৰ দাখিল কৰাৰ পিচতো আৰক্ষী তথা জিলা প্ৰশাসনে কোনো ব্যৱস্থা নোলোৱাত তীব্ৰ প্ৰতিক্ৰিয়াৰ সৃষ্টি হৈছে ৷
জানিব পৰা মতে, যোৱা শুকুৰবাৰৰ দিনা দিনৰ প্ৰায় 11.30 বজাত অধিবক্তা জাহিদুল ইছলামে নিজৰ মাটিৰ কাম লৈ সৃজনগ্ৰাম ৰাজহ চক্ৰৰ কাৰ্যালয়ত উপস্থিত হয় । লাটমণ্ডল ছাইদুৰ ৰহমানে দিনৰ প্ৰায় 12 বজাত কাৰ্যালয় ৷ উপস্থিত হৈ কেইজনমান ব্যক্তিৰ সৈতে কাৰ্যালয়ৰ পিচফালে উৎকোচ সম্পৰ্কীয় আলোচনাত ব্যস্ত থাকে ৷ এই অভিযোগ কৰে অধিবক্তা জাহিদুলে । আনকি অধিবক্তাজনে লাটমণ্ডলক নিজৰ স্থানলৈ আহিবলৈ কয় যদিও তেওঁ নাহে বুলি অধিবক্তাজনে অভিযোগ তোলে ।
আনকি জংঘলত আলোচনা কৰি থকাৰ ভিডিঅ’ অধিবক্তাজনে কেমেৰাত অৱদ্ধ কৰি থকা প্ৰত্যক্ষ কৰি অধিবক্তাজনক মাৰপিট কৰে বুলিও অভিযোগ তোলে ভুক্তভোগী অধিবক্তাজনে । লাটমণ্ডল ছাইদুৰ ৰহমানে টকা নোহোৱাকৈ কোনো কামে নকৰে আৰু সকলোৰে লগত দুৰ্ব্যৱহাৰ কৰে বুলি দীৰ্ঘদিন ধৰি অভিযোগ উত্থাপন হৈ আহিছে ।
আনকি লাটমণ্ডলজনৰ উদ্ভণ্ডালি দিনক দিনে বৃদ্ধি পায় অহাৰ পিচতো বঙাইগাঁও জিলা প্ৰশাসনে কোনো ব্যৱস্থা নোলোৱাৰ অভিযোগ উত্থাপন কৰিছে ভুক্তভোগীয়ে । লাটমণ্ডলজনক বদলি কৰাৰ বাবে জিলা উপায়ুক্তৰ ওচৰত দাবী জনায় স্থানীয় লোকে ।
উল্লেখ্য যে, লাটমণ্ডল ছাইদুৰ ৰহমানৰ বিৰুদ্ধে বহুলোকে স্বাক্ষৰিত অভিযোগ জিলা উপায়ুক্ত আৰু মহকুমাধিপতি প্ৰেৰণ কৰিছিল যদিও কোনো ব্যৱস্থা লোৱা নাই বুলি অভিযোগ উঠিছে । দুৰ্নীতিৰ বিৰুদ্ধে শূণ্য সহনশীল স্থিতি গ্ৰহণ কৰা বুলি দাবী কৰি অহা ৰাজ্য চৰকাৰখনে অভিযুক্ত লাটমণ্ডলগৰাকীৰ বিৰুদ্ধে কি ব্যৱস্থা গ্ৰহণ কৰে সেয়া হ’ব পৰৱৰ্তী সময়ত লক্ষণীয় বিষয় ৷
লগতে পঢ়ক : Mising Olympics at jonai: অক্টোবৰত তিনিদিনীয়াকৈ অনুষ্ঠিত হ’ব মিচিং অলিম্পিক
