মানুহে ছাল উজ্বল আৰু ধুনীয়া কৰি তুলিবলৈ বিভিন্ন ধৰণৰ বিউটি প্ৰডাক্টছ ব্যৱহাৰ কৰে ৷ কিন্তু কেৱল বজাৰত লাভ কৰা সামগ্ৰী ব্যৱহাৰ কৰিলেই নহয়, ছাল সুস্থ কৰি ৰখাও প্ৰয়োজন ৷ যদি আপুনি উজ্বল আৰু ধুনীয়া ছাল বিচাৰে তেন্তে পুৱা স্বাস্থ্যকৰ পানীয় খোৱা আৱশ্যক ৷ বহুতে গ্ৰীণ টি খাবলৈ ভাল পায়, কিছুমানে মৌৰ লগত মিহলি কুহুমীয়া পানী খায়, আনহাতে কিছুমানে হালধি পানী খায় ৷
কিন্তু প্ৰশ্ন হয়, পুৱা সাৰ পোৱাৰ পাছত কি খোৱা স্বাস্থ্যৰ বাবে ভাল ? কোনটো পানীয়ই আপোনাৰ ছালখনক ভিতৰৰ পৰা পুষ্টি দিব পাৰে আৰু ইয়াক প্ৰাকৃতিকভাৱে উজ্জ্বল কৰি তুলিব পাৰে ?
গ্ৰীণ টিত প্ৰচুৰ পৰিমাণে এন্টিঅক্সিডেন্ট, পলিফিনল আৰু কেটেচিন থাকে, যিয়ে শৰীৰৰ পৰা বিষাক্ত পদাৰ্থ বাহিৰ কৰাত সহায় কৰে ৷ ই আপোনাৰ ছালখনত ভিতৰৰ পৰা পৰিষ্কাৰ কৰি ৰখাৰ লগতে শালমইনা, বয়স বৃদ্ধিৰ প্ৰভাৱত বাধা দিয়াতো সহায় কৰে ৷ গতিকে পুৱা খালী পেটত গ্ৰীট টি খাব পাৰে ৷ ইয়াত মৌ আৰু নেমু মিহলালে সোৱাদ বৃদ্ধি পোৱাৰ লগতে উপকাৰিতাও বৃদ্ধি পায় ৷ ই শৰীৰৰ চৰ্বি কমোৱাতো সহায় কৰে ৷
আয়ুৰ্বেদত মৌক আটাইতকৈ উপকাৰী প্ৰাকৃতিক ঔষধ বুলি গণ্য কৰা হয় ৷ পুৱা আপুনি কুহুমীয়া পানীৰ সৈতে মৌ মিহলি কৰি খাব পাৰে ৷ ই ছালখনত ভিতৰৰ পৰা পুষ্টি প্ৰদান কৰে আৰু কোমল কৰি ৰখাত সহায় কৰে ৷ মৌ-পানীৰ মিশ্ৰণে ছালখনক হাইড্ৰেটেড কৰি ৰাখে ৷ ই ছালক উজ্বলতা প্ৰদান কৰে লগতে ৰোগ প্ৰতিৰোধ ক্ষমতা বৃদ্ধি কৰে ৷ ই ছালক প্ৰাকৃতিকভাৱে কোমল কৰি তোলে ৷ গতিকে পুৱা এগিলাচ কুহুমীয়া পানীত ১ চামুচ মৌ মিহলাই খালী পেটত খাব পাৰে ৷ ইয়াৰোপৰি ইয়াত অলপ নেমু ৰসো মিহলি কৰিব পাৰে ৷
হালধিত কাৰকুমিনৰ দৰে এক শক্তিশালী এন্টিঅক্সিডেন্ট আৰু এন্টি-ইনফ্লেমেটৰী উপাদান, যি আপোনাৰ ছালৰ বাবে অতি উপকাৰী ৷ হালধিয়ে ছাল ভিতৰৰ পৰা পৰিষ্কাৰ কৰি উজ্বলতা আনে ৷ ই শালমইনাও কম কৰে আৰু দাগ নোহোৱা কৰে ৷ গিলাচ কুহুমীয়া পানীত ১/৪ চামুচ হালধি গুড়ি মিহলাই খাব পাৰে ৷ পুৱা খালী পেটত এয়া খালে ভাল ৷
কোনবিধ ভাল
যদি আপুনি এন্টি এজিং (বয়সৰ প্ৰভাৱ ৰোধ) আৰু ডিটক্সিফিকেশনৰ ওপৰত গুৰুত্ব দিব বিচাৰে তেন্তে গ্ৰীণ টি হ’ল সৰ্বোত্তম বিকল্প ৷ যদি আপোনাৰ ছালখন শুকান হৈ থাকে তেন্তে ইয়াক হাইড্ৰেটেড আৰু কোমল কৰিবলৈ মৌ-পানী ভাল ৷ ইয়াৰোপৰি যদি আপোনাৰ ছালত দাগ, শালমইনা আদি থাকে তেন্তে হালধি- পানী উপকাৰী ৷
(সতৰ্কীকৰণ: এই প্ৰতিবেদনত আপোনাক দিয়া সকলো স্বাস্থ্য তথা জীৱনশৈলী সম্পৰ্কীয় যিকোনো তথ্য আৰু পৰামৰ্শ কেৱল আপোনাৰ সাধাৰণ তথ্যৰ বাবেহে আগবঢ়োৱা হৈছে । আমি এই তথ্য বৈজ্ঞানিক গৱেষণা, অধ্যয়ন, চিকিৎসা আৰু স্বাস্থ্য পেছাদাৰী পৰামৰ্শৰ ভিত্তিত প্ৰদান কৰিছো । আপুনি এই উপায় বা পদ্ধতি অনুসৰণ কৰাৰ আগতে এই বিষয়ে বিতংভাৱে জনাটো উচিত তথা আপোনাৰ ব্যক্তিগত চিকিৎসকৰ পৰামৰ্শ গ্ৰহণ কৰাটো উচিত ।)
লগতে পঢ়ক
