চিৰাঙত বিদ্যুৎস্পৃষ্ট হৈ ছাত্ৰৰ মৃত্যু

চিৰাঙত বিদ্যুৎস্পৃষ্ট হৈ আই টি আই ছাত্ৰৰ মৃত্যু । ছাত্ৰজনৰ অকাল মৃত্যুত শোকৰ ছাঁ পৰিছে অঞ্চলটোত ৷

চিৰাঙ, 10 ছেপ্তেম্বৰঃ চিৰাং জিলাৰ ঢালিগাঁও থানাৰ অধীনৰ শিমলাগুৰী গাঁৱৰ ছাত্ৰ এজনে সোমবাৰে বৈদ্যুতিক পাংখা মেৰামতি কৰা অৱস্থাত মৃত্যু মুখত পৰে ৷ তথ্যনুসৰি, শিমলাগুৰী নিবাসী ৰেল বিভাগৰ কৰ্মচাৰী হৰেন্দ্ৰ চন্দ্ৰ বৰ্মণৰ একমাত্ৰ পুত্ৰ অভিজিত বৰ্মণে বিয়লি নিকটৱৰ্তী গাঁও নিলীবাৰীৰ শহুৰেকৰ ঘৰত চিলিং ফেন (পাংখা) মেৰামতি কৰি থকা সময়তে বিদ্যুৎস্পৃষ্ট হৈ অসুস্থ হৈ পৰে ৷ ঘটনাৰ পাছতে যুৱকজনক বঙাইগাঁৱৰ স্বাগত হাস্পাতাল এণ্ড ৰিচাৰ্ছ চেন্টাৰত ভৰ্তি কৰোৱা হয় যদিও চিকিৎসাধীন অৱস্থাত মৃত্যু হয় ৷ মৃত অভিজিত বৰ্মণ বঙাইগাঁও ঔদ্যোগীক প্ৰশিক্ষণ কেন্দ্ৰৰ ইলেট্ৰিকেল বিভাগৰ চূড়ান্ত বৰ্ষৰ ছাত্ৰ আছিল ৷ মৃত্যুৰ সময়ত যুৱকজনে পিতৃ-মাতৃ, পত্নী ডেইজী বৰ্মণ আৰু ভনীয়েকক ইহ সংসাৰত এৰি থৈ যায় ৷