বঙাইগাঁও, 6 এপ্ৰিল : তৃতীয় পৰ্যায়ৰ নিৰ্বাচনৰ দিনাই 32 নং বঙাইগাঁও বিধানসভা সমষ্টিৰ অন্তৰ্গত 619 নং পশ্চিম ভাদ্ৰাগাঁও এল পি স্কুলৰ 91 নং ভোটকেন্দ্ৰত সৃষ্টি হয় এক উত্তেজনাময় পৰিৱেশৰ ৷ নিৰাপত্তাৰক্ষী আৰু ভোটাৰসকলৰ মাজত পৰিলক্ষিত হয় প্ৰচণ্ড মাৰপিট ৷
নিৰাপত্তা বাহিনীৰ লোকে ভোটাৰসকলক লাঠিৰে প্ৰহাৰ কৰাক কেন্দ্ৰ কৰি সৃষ্টি হৈছে এই উত্তেজনাৰ ৷ লগে লগে বন্ধ হৈ পৰে ভোটকেন্দ্ৰটোৰ ভোটদান প্ৰক্ৰিয়া ৷ প্ৰত্যক্ষদৰ্শীৰ অভিযোগ অনুসৰি, ভোটকেন্দ্ৰটোত নিয়োজিত চিআৰপিএফ জোৱানে বিনা কাৰণত সাধাৰণ ভোটাৰক প্ৰহাৰ কৰে ৷ যাৰ ফলস্বৰূপে সৃষ্টি হয় এই উত্তেজনাৰ ৷
নিৰাপত্তা বাহিনীৰ লাঠিৰ প্ৰহাৰত কেইবাগৰাকী লোক আহত হোৱা বুলি জানিব পৰা গৈছে ৷ ইতিমধ্যে বঙাইগাঁও আৰক্ষী অধীক্ষক উপস্থিত হৈ পৰিস্থিতি নিয়ন্ত্ৰণ কৰে আৰু দুঘণ্টা বন্ধ হৈ থকা ভোটকেন্দ্ৰটোত পুনৰ ভোটদান আৰম্ভ হয় ৷ ইফালে, কোনো ভোটাৰক প্ৰহাৰ নকৰাৰ কথা সাংবাদিকৰ আগত উল্লেখ কৰে আৰক্ষী অধীক্ষকে ৷
লগতে পঢ়ক : নিজৰ বিজয়ক লৈ নিশ্চিত ইউপিপিএলৰ প্ৰাৰ্থী লৰেঞ্চ ইছলাৰী
