নিউজ ডেস্ক, ১৬ অক্টোবৰ: দেশৰ বেংকিং সেৱাক এক নতুন গতিশীলতা প্ৰদান কৰি প্ৰধানমন্ত্ৰী নৰেন্দ্ৰ মোডীয়ে (PM Modi virtually inaugurated digital bank) দেওবাৰে ভিডিঅ' কনফাৰেন্সযোগে আনুষ্ঠানিকভাৱে দেশৰ ৭৫ খন জিলাত ৭৫টা ডিজিটেল বেংকিং শাখা মুকলি কৰে । এই ৭৫ খন জিলাৰ ভিতৰত অসমৰ বঙাইগাঁও জিলাতো পঞ্জাৱ নেচনেল বেঙকৰ এটা ডিজিটেল বেংকিং শাখা মুকলি কৰা হয় ।
এই উপলক্ষে আয়োজিত প্ৰধানমন্ত্ৰী নৰেন্দ্ৰ মোডীৰ অনুষ্ঠানত বঙাইগাঁৱৰ পৰা ভাৰ্চুৱেলী অংশগ্ৰহণ কৰে কেন্দ্ৰীয় মন্ত্ৰী সৰ্বানন্দ সোণোৱালে (Union Minister Sarbananda Sonowal at Bongaigaon) । প্ৰধানমন্ত্ৰী নৰেন্দ্ৰ মোডীয়ে কয়,"সমগ্ৰ দেশবাসীয়ে এতিয়া ডিজিটেল ইণ্ডিয়াৰ সামৰ্থ্য আৰু সফলতাৰ সাক্ষী হৈছে । ডিজিটেল বেংকিং শাখাবোৰ হৈছে ভাৰতৰ জনসাধাৰণৰ জীৱন সহজ কৰাৰ বাবে দেশত চলি থকা অভিযানসমুহৰ আন এক বৃহৎ পদক্ষেপ । এইটো এটা বিশেষ বেংকিং প্ৰণালী যিয়ে সীমিত ডিজিটেল আন্তঃগাঁথনিৰ জৰিয়তে সৰ্বাধিক সেৱা প্ৰদান কৰিবলৈ সক্ষম হ'ব ।"
তেওঁ পুনৰ কয়," আমি দূৰৱৰ্তী প্ৰতিটো পৰিয়াললৈ বেংকিং সেৱা ওচৰলৈ লৈ যোৱাত বিশেষ অগ্ৰাধিকাৰ দি আহিছো । এতিয়া ভাৰতৰ ৯৯ শতাংশতকৈও অধিক গাঁৱত ৫ কিলোমিটাৰৰ ভিতৰত বেংক শাখা, বেংকিং আউটলেট বা বেংকৰ সংশ্লিষ্ট কৰ্মী উপলব্ধ হৈছে । আন্তৰ্জাতিক মুদ্ৰা নিধিয়েও (IMF) ভাৰতৰ ডিজিটেল বেংকিং আন্তঃগাঁথনিৰ ভূয়সী প্ৰশংসা কৰিছে । ইয়াৰ অন্যতম কৃতিত্ব দিব লাগিব নতুন প্ৰযুক্তি অৱলম্বন কৰা দেশৰ আৰ্থিকভাৱে পিছপৰা লোকসকলক আৰু কৃষক তথা শ্ৰমিকসকলক, যিসকলে এই নতুন প্ৰযুক্তিক তেওঁলোকৰ জীৱনৰ অংশ কৰি তুলিছে । "
