বঙাইগাঁও,১৯জুলাই : ৰাজ্যৰ অন্য প্ৰান্তৰ সমান্তৰালকৈ বঙাইগাঁও জিলাতো বানে চলাইছে তাণ্ডৱ । জিলাখনৰ বিস্তীৰ্ণ অঞ্চলৰ ঘৰ-দুৱাৰ ডুব গৈছে পানীত । যোগীঘোপাতো সৃষ্টি হৈছে ভয়ংকৰ বান । এই বানৰ বাবে বানাক্ৰান্তৰ মাজত সৃষ্টি হৈছে হাহাকাৰ পৰিস্থিতিৰ । বানাক্ৰান্তই পোৱা নাই কোনো চৰকাৰী সাহায্য ।
বঙাইগাঁওৰ অভয়াপুৰীতো ভয়াৱহ বানত ডুব গৈছে অঞ্চলটোৰ সকলো ঘৰ-দুৱাৰ । এই বানৰ বাবে অভয়াপুৰীৰ সমীপৱৰ্তী খোৰাগাঁও গাঁও পঞ্চায়তৰ অন্তৰ্গত উত্তৰ খোৰাগাঁও, কেৰখাবাৰী প্ৰথম আৰু দ্বিতীয় খণ্ডৰ প্ৰায় শতাধিক বানাক্ৰান্তই দুৰ্ভোগ ভুগিব লগীয়া হৈছে । বাঢ়নী পানীত গাঁও কেইখনৰ ঘৰ-বাৰী জলমগ্ন হোৱাৰ বাবে শতাধিক লোকে কেৰখাবাৰী ৰে’লপথৰ দাঁতিতে বিপদ সংকুলভাৱে শিৱিৰ পাতি পশুধনৰ সৈতে সহাৱস্থান কৰিবলৈ বাধ্য হৈ পৰিছে । ৰে’লপথৰ দাতিত আশ্ৰয় লৈ থকা বানপীড়িত সকলৰ খবৰ লবলৈ এতিয়ালৈকে মহকুমা প্ৰশাসনৰ কোনো লোক উপস্থিত হোৱা নাই ।
