চিৰাং, 29 অক্টোবৰঃ চিৰাঙৰ বিজনীত 128 বছৰ গঢ়কা ঐতিহাসিক শ্ৰীশ্ৰী লক্ষ্মী মন্দিৰত চুৰিকাণ্ড ৷ বিজনী থানাৰ গাতে লাগি থকা ৰজাদিনীয়া মন্দিৰত চুৰি কাৰ্য সংঘটিত হোৱাত তীব্ৰ প্ৰতিক্ৰিয়া ৷ বিজনীৰ ঐতিহাসিক লক্ষ্মী মন্দিৰৰ পিছফালে থকা গ্ৰীলৰ তলা ভাঙি চোৰৰ দলে ভিতৰত প্ৰৱেশ কৰি দান পাত্ৰটো লুটি নিয়ে ৷ পুৱাৰ ভাগত মন্দিৰ চোৱা-চিতা কৰা লোকজনে দৰ্জাৰ তলা ভঙা প্ৰত্যক্ষ কৰে ৷ বিষয়টো মন্দিৰ পৰিচালনা সমিতিক অৱগত কৰাৰ পিছত পৰৱৰ্তী সময়ত আৰক্ষীক বিষয়টো জনোৱা হয় ৷ অৱশ্যে মন্দিৰৰ ভিতৰত থকা বাকী সা-সম্পত্তি আৰু মুৰ্তি আদি অক্ষত অৱস্থাত আছে বুলি উল্লেখ কৰে স্থানীয় ৰাইজে ৷ উল্লেখ্য যে ছয় মাহ পূৰ্বেও বিজনীৰ এই মন্দিৰটোত চুৰি কাৰ্য সংঘটিত হৈছিল ৷ থানাৰ সন্মুখতে চোৰে ধন লুট কৰি নিয়াৰ পিছতো আৰক্ষীৰ নিৰ্লিপ্ত ভূমিকাক লৈ ৰাইজে ধিক্কাৰ জনোৱা পৰিলক্ষিত হৈছে ৷
আৰু পঢ়কঃ নেপালী পৰ্বতাৰোহীৰ নৱ অভিলেখঃ 7 মাহত 14 টাকৈ শৃংগ আৰোহণ
