বঙাইগাঁও, 14 মে': ৰাজ্যজুৰি কৰ'ণা ভাইৰাছে ভয়াৱহ ৰূপ ধাৰণ কৰাৰ সময়তে কৰ'ণাৰ হটস্পতলৈ পৰিণত হৈছে বঙাইগাঁও জিলাৰ অভয়াপুৰী জিলা কাৰাগাৰ ৷ বৰ্তমানলৈকে কাৰাগাৰ খনৰ 36 গৰাকী কাৰাবন্দীৰ দেহত ধৰা পৰিছে ক'ভিড-19 পজিটিভ ৷ এই ভয়াৱহ পৰিস্থিতি নিয়ন্ত্ৰণ কৰিবলৈ প্ৰশাসনৰ তৰফৰ পৰা কাৰাগাৰৰ ভিতৰতে চিকিৎসা প্ৰদান কৰা হৈছে ক'ভিডত আক্ৰান্তসকলক ৷ কাৰাগাৰৰ ভিতৰতে ক'ভিড কেয়াৰ চেন্টাৰৰ ব্যৱস্থা কৰি ক'ভিড আক্ৰান্তসকলক চিকিৎসা প্ৰদান কৰি থকা হৈছে ৷
বৰ্তমান কাৰাগাৰৰ ভিতৰত স্থাপন কৰা ক'ভিড কেয়াৰ চেন্টাৰত চিকিৎসক,নাৰ্ছ, চাফাইকৰ্মীকে ধৰি স্বাস্থ্য বিভাগৰ দলে দায়িত্ব পালন কৰি আছে ৷ ইয়াৰ ওপৰিও জৰুৰীকালীন পৰিস্থিতিৰ বাবে অক্সিজেনো মজুত কৰি ৰখা হৈছে ক'ভিড কেয়াৰ চেন্টাৰত ৷
উল্লেখ্য যে, এই খবৰ পোহৰলৈ অহাৰ লগে লগে কাৰাগাৰৰ ভিতৰৰ লগতে স্থানীয় অঞ্চলটোত সৃষ্টি হৈছে আতংকৰ ৷ এনে পৰিৱেশত মূলত কাৰাগাৰত থকা আন আন কয়দীসকলৰ বাবে অধিক প্ৰত্যাহ্বান আহিছে । কিন্তু অভয়াপুৰী জিলা কাৰাগাৰত ক'ৰ পৰা কেনেকৈ ক'ভিড সংক্ৰমন ঘটিল সেই বিষয়ে অৱশ্যে কোনো তথ্য প্ৰকাশ কৰা নাই কাৰাগাৰ কৰ্তৃপক্ষ বা স্বাস্থ্য বিভাগে ৷
লগতে পঢ়কঃ ৰাজ্যৰ 31 খন কাৰাগাৰৰ 167 গৰাকী কয়দী আক্ৰান্ত কৰ’ণাত
