চিৰাং,5 আগষ্ট : নিউবঙাইগাঁও ৰেলৱে চিকিৎসালয়ত ভৰ্তি হৈ থকা এজন ৰোগী দেওবাৰৰ পৰা অন্তৰ্ধান হোৱা ঘটনাই সমগ্ৰ অঞ্চলটোত সৃষ্টি কৰিছে চাঞ্চল্যৰ ৷ নিউ বঙাইগাঁও ৰেলৱে চিকিৎসালয়ত ৩ আগষ্ট তাৰিখে জ্বৰ তথা দুৰ্বলতাজনিত ৰোগৰ বাবে ভৰ্ত্তি কৰা হৈছিল ৰেল বিভাগৰ কৰ্মচাৰী ৰজনী বণিকক ৷ ৰজনী বণিকৰ জীয়ৰী দুলুমণি বণিকৰ ভাষ্য অনুসৰি ৩ তাৰিখে ৰাতি তেখেতক চিকিৎসালয়ত ভৰ্তি হৈ থকা আন এজন ৰোগীয়ে ৰজনী বণিকৰ অৱস্থা সংকটজনক বুলি খবৰ দিয়াৰ পিছত ৪ তাৰিখে তেওঁ ৰাতিপুৱা প্ৰায় ১০ বাজি ৩০ মিনিটত চিকিৎসালয়ত আহি পায় ৷ কিন্তু সেইসময়ত অসুস্থ পিতৃ নাছিল চিকিৎসালয়ৰ বিছনাত ৷ চিকিৎসালয়ৰ কৰ্মীৰ লগতে কোনো ৰোগীয়েও দেউতাকৰ খবৰ দিব নোৱৰাত পুত্ৰ-কন্যাই সোমবাৰে নিউবঙাইগাঁও ডাংতল আৰক্ষী পহৰা চকীত দাখিল কৰে এজাহাৰ ৷ এই সম্পৰ্কত দায়িত্বহীন মন্তব্য কৰে চিকিৎসালয়খনৰ বৰ্তমানৰ দায়িত্বত থকা ড. তমঘ্ন দাসে ৷ তেওঁ কয় যে চিকিৎসালয়ত সুৰক্ষাৰ কৰ্মী কোনো ব্যবস্থা নাই , ৰোগী নিজে ওলাই গলে হাস্পতাল কৰ্তৃপক্ষই কোনো দায়িত্ব নাই ৷ আনকি বাতৰি সংগ্ৰহ কৰিবলৈ যোৱা সাংবাদিকসকলকো দুৰ্বব্যৱহাৰ কৰাৰ অভিযোগ ড. তমঘ্ন দাসৰ বিৰুদ্ধে ৷
উত্তৰ পূৱ সীমান্ত ৰেলৱে মজদুৰ ইউনিয়নে সেই নিখোজ ব্যক্তিজনক তৎকালে সন্ধান উলিওৱাৰ লগতে এই ঘটনাৰ বাবে দোষীক শাস্তিৰ দাবী জনায় ৷ ইউনিয়নৰ বঙাইগাঁও শাখাৰ সম্পাদক শম্ভু প্ৰসাদ দাসে কয় যে, এজন ব্যক্তি চিকিৎসালয়ত ভৰ্ত্তি হোৱাৰ লগে লগে তেওঁৰ সমস্ত দ্বায়িত্ব চিকিৎসালয়ত ওপৰত আহি পৰে ৷ নিখোজ বণিকৰ অনতিপলমে সন্ধান উলিওৱাৰ লগতে এই সমগ্ৰ ঘটনাৰ তদন্তৰ দাবী কৰে সম্পাদকজনে ৷
