বঙাইগাঁও, 9 নৱেম্বৰ: সন্দেহযুক্ত বিদেশী নাগৰিকৰ অভিযোগত অভিযুক্ত হৈ ডিটেনচন কেম্পত তিনিবছৰে বন্দীত্বৰ জীৱন কটোৱা বঙাইগাঁও জিলাৰ ভিন্ন প্ৰান্তৰ পাঁচগৰাকী পুৰুষ-মহিলা শুকুৰবাৰে আহিল মুকলি আকাশৰ তললৈ ৷ শুকুৰবাৰে বিয়লি বঙাইগাঁও আৰক্ষী অধীক্ষকৰ কাৰ্যালয়ত বিদেশী ন্যায়াধীকৰণ বিভাগ,আৰক্ষী বিভাগৰ যাৱতীয় কাম কাজ সম্পূৰ্ণ হৈ উঠাত জিলাখনৰ তিনিগৰাকী পুৰুষ আৰু দুগৰাকী বন্দী মহিলাই ডিটেনচন শিবিৰৰ পৰা মুক্তি লাভ কৰে ৷ অৱশ্যে উল্লিখিত পাঁচগৰাকী লোকে ডিটেনচন শিবিৰৰ পৰা মুক্তি লাভ কৰিলেও আৰক্ষী আৰু বিদেশী ন্যায়াধীকৰণ আদালতৰ স'তে যোগাযোগ অব্যাহত ৰাখিব লাগিব ৷
উল্লেখ্য যে,গোৱালপাৰা ডিটেনচন শিবিৰৰ পৰা মুক্তি লাভ কৰা লোক তিনিজন হৈছে যোগীঘোপা থানাৰ অধীনৰ কচুদোলা গাঁৱৰ দুখধন দাস (৫০), মাণিকপুৰ থানাৰ অধীনৰ গেৰুকাবাৰীৰ ৰতন বিশ্ৱাস (৫৫) আৰু অভয়াপুৰী কাছাৰীপেটিৰ ৰাজ কুমাৰ মণ্ডল (৪০) ৷ ইপিনে কোকৰাঝাৰ ডিটেনচন শিবিৰৰ পৰা মুক্তি লাভ কৰা মহিলা দুগৰাকী হৈছে মাণিকপুৰ থানাৰ অন্তৰ্গত নগৰঝাৰৰ শান্তি বালা মণ্ডল (৬০) আৰু অভয়াপুৰী অঞ্চলৰ চাবিনা বেওৱা (৫৮) ৷
সন্দেহজনক বিদেশী নাগৰিকৰ অভিযোগত অভিযুক্ত হৈ বিগত তিনি বছৰো অধিক কাল বন্দীত্বৰ জীৱন কটাইছিল ৷ বন্দীত্বৰ জীৱন কটাই মুকলি আকাশৰ তললৈ অহা আটাইকেইজন লোকেই নিজকে ভাৰতীয় বুলি উল্লেখ কৰে ৷ নিজৰ পূৰ্বপুৰুষৰ নথিত নামৰ সামান্য ভুলৰ বাবেই এই দৰে বন্দিত্বৰ জীৱন কটাবলগীয়া হ’ল বুলি প্ৰকাশ কৰে ।
গোৱালপাৰা ডিটেনচন কেম্পৰ পৰা মুক্তি লাভ কৰা বঙাইগাঁও জিলাৰ যোগীঘোপা থানাৰ অধীনৰ কচুদোলা গাঁৱৰ দুখধন দাস (৫০)নামৰ লোকজনৰ পত্নীয়ে সংবাদ মাধ্যমক জনোৱা মতে তেখেতৰ স্বামী বন্দীত্বৰ জীৱন কটোৱা সময় ছোৱাত মনোৱাৰ হুচেইন নামৰ যোগীঘোপাৰ এগৰাকী সাংবাদিকে পৰিয়ালটিৰ যাৱতীয় খৰচ বহন কৰিছিল । সম্প্ৰীতিৰ নিদৰ্শন দাঙি ধৰি পৰিয়ালটিক ৰক্ষা কৰিছিল মনোৱাৰে । আজি তেখেতৰ স্বামী মুকলি আকাশৰ তললৈ অহাৰ লগে লগে আনন্দত আত্মহাৰা হয় পৰিয়োলটো ।
